Kinabuhi nausik gumikan sa mga gahi

Gipakpakan ko ang kagamhanan sa Mandaue City, labi na ilang konseho, sa pagpanday og balaod nga maghatag og silot sa mga residenting nagpuyo duol sa kasapaan, kinsa dili gayod morespeto sa awhag sa mga otoridad nga pabakwiton panahon nga nag-atubang ang mga lumolupyo og dakong kakuyaw nga ikadulot sa nagsingabot mapangahasong bagyo o uban pang namatikdang katalagman.

Ang pag-awas sa kasapaan nga natam-okan sa naglaundok-nagkalainlaing plastik ug ubang matang sa hugaw, diin maoy hinungdan sa daling pagbaha sa pipila ka kadalanan sa dakbyan panahon sa ting-ulan, igo nang makatug-an nga wala tahora sa mga lumolupyo ang makanunayong pahimangno sa mayor: Ang dili paghimog basurahan sa kasapaan.

Bisa’g gamay’ng kaikog na lang unta ngadto sa gobiyerno, kinsa temporariyong mitugot nga makapuyo sila daplin sa kasapaan. Pastilan, wala gyod nila tahora! Bisag ang maong kamandoan, para ra sa ilang kaluwasan.

Sa Central Luzon, lima ka rescuer ang nangamatay human sungsonga ang bagyong Karding aron luwason ang mga gahig ulong residente, kinsa bisag kapila na awhagang  pabakwiton sa bahaanon nilang gipuy-an samtang wala pa moabot ang bagyo, wala gyod manumbaling.

Nakalimot nga sama nila, ang rescuers, may pamilya usab nga nagmahal ug nagsalig kanila. Nakalimot ang mga gahi, nga wala gyoy bawot ang tawo batok sa makalilisang bagyo. Lunoron man gani ang mga dagkong barko bisan mitago? Samot na, mga rubber boat nga maoy sagad gamiton-sakyan sa rescuers pagsungsong sa makusog baha sa kamatayon?

Thumbs up ko sa mandatory danger zone evacuation ordinance nga giumol sa konseho sa Mandaue City, diin gaan ra kaayog silot: P500-P5,000 ra ang multa ug mahimong mapriso ang nakasupak: gikan sa 30 ka adlaw ngadto usa ka tuig. Mora mag kusi ra ni, uy, Mayor Jonas Cortes?

Angay hinuktokan. Nga sa kagahig ulo sa mga gipabakwit, mahimong moresulta kini sa pagkausik sa kinabuhi sa mga masinupakon ug rescuers sama sa nahitabo didto sa kaulohan. Makonsiderar bayang usa ka indirect criminal act kining ilang gihimo. Sanglit, mga kinabuhi ang posibleng mausik tungod sa ilang kagahi.

Hain kahay maayong dili na lang papuy-an kining danger zone areas ug ibalhin tanang namuyo dinhi, didto sa mas luwas nga lugar? Kaya ba, Mayor?