EDITORYAL - SIM Card registration

Mahunong na unya ang mga pagpanghulga, pagpang-scam, pagpangawat og identity sa usa ka indibidwal nga binuhatan sa mga tawong buot mamiktima pinaagi sa cellphones.

Napasar na sa kataposang pagbasa sa Senado ang balaudnon nga nagtinguhang iparehistro na ang tanang subscribers identity modules (SIMs) sa mga mobile phone users.

Ang Senate Bill 310 nga gimugna ug gipangusgan ni Senador Grace Poe, tsirman sa senate committee on public service, sa nanglabay na nga mga Kongreso apan pirme lang matambakan sa ubang balaudnon ug wala gyud mapasar.

Ang pagpasar niini sa Senado tayming usab kay nagkadaghan ang mga kriminal, manghulga ug mga mangingilad nga mogamit og cellphone sa ilang modus operandi. Pinaagi sa maong balaudnon kun kini mapasar man, ma-trace na kun si kinsa o kang kinsa ang mga mobile phone numbers tungod kay kinahanglan naman kining iparehistro apil ang pangalan, address ug edad sa tagiya sa numero.

Apan kinahanglang magmabinantayon gihapon ang mga subscribers tungod kay posible sab kining maabusaran sa mga naa sa gahum nga dunay pagdumot kanila aron panid-an ang ilang mga kalihokan.

Kinahanglan nga aduna kini proteksyon gikan niining pagpangabuso tungod kay ang tumong sa maong balaod mao man ang proteksyon sa subscribers unya salikwaot nga pinaagi sab niini mahimo nang utingkayon ang personal nga impormasyon sa tagiya sa numero.

Gawas pa niini, mahimo na pakgangon ang mga tigpakatap og fake news ug misinformation. Ang bati lang niini posibleng mao kini mahimong babag sa kagawasan sa mga tawo nga mopadayag og disgusto ug pagsaway sa mga representante sa gobiyerno sanglit ma-trace man dayon kanila ang impormasyon.