Harassment

Gipasanginlan ni Seniorita Gemma Wilson, chairperson sa Ernesto C. Ouano Development and Management Corporation (ECODEMCOR), si Atty. Gerry Carillo nga nanapi sa ilang korporasyon. Gawas sa pagpanapi, gipasanginlan usab ni Seniorita Gemma ang abogado nga nang-harass sa ilang mga kawani ug gipaguyod pa ang sakyanan nga gipanag-iya sa iyang umagad nga si Atty. Jong Sepulveda.

Si Carillo, pangulo sa disaster management Cebu City Government, mao ang abogado ni Jerry Uy, usa sa mga tag-iya sa Ocean Transport nga nag-abang sa yarda nga gipanag-iya sa ECODEMCOR.

Ang ECODEMCOR mipasaka og kaso batok sa Ocean Transport ug ni Jerry Uy tungod kuno sa kapakyas niini sa pagbayad sa ilang abangan sa yarda sulod na sa walo ka tuig nga miabot na  milyones ka pesos.

Tungod sa giingong kapakyas ni Uy sa pagbayad sa abangan niini, gisiradan sa ECODEMCOR ang ilang yarda niadtong Agosto 12, 2022 apan gi-harass kuno sa abogado ang mga kawani nga nagbantay niini.

Si Seniorita Gemma Wilson namasangil ni Atty. Carillo nga nangayo kaniya ug sa ilang korporasyon og usa ka milyon ka pesos aron mobayad ang iyang kliyente nga si Jerry Uy. Apan mihatag lamang sila og tunga sa milyon ka pesos. Tuod man mibayad si Uy ug treyenta milyones ka pesos sa ECODEMCOR.

Nangayo na usab kuno og laing usa ka milyon ka pesos si Atty. Gerry Carillo apan wala na mihatag kaniya ang ECODEMCOR.

Niadtong Septyembre 24 ug 25 kuyog ang giingon nga mga sakop sa Criminal Investigation and Detection Group (CIDG-7) subli nga nang-harass sa mga kawani sa ECODEMCOR nga gipabantay sa ilang yarda diin dinhi gipaguyod na sa abogado ang sakyanan nga gipanag-iya ni Atty.Jong Sepulveda nga giparking sa yarda.

Gipanghimakak niCarillo ang pasangil ni Seniorita Gemma. Ang abogado mipasabot nga wala siya mangharas ug ang iyang gihimo mao lamang ang pagsunod sa mando sa hukmanan nga gilapas ni Seniorita Gemma Wilson human gibarikadahan niini ang gate sa yarda nga giabangan sa iyang kleyente nga midaug sa kaso. Gihagit sa abogado ang reklamante nga pamatud-an ang iyang pasangil aron dili niya kini pasakaan og kasong libelo.