Mobayad sa utang angayan pakauwawan?

Ang pagpangutang nahimo na kining kabahin sa kinabuhi makabus man o adunahan. Kong pobre ka ginagmay ra pud ang utang ug kong datu aw dinatu pud ang utang.

Ambot kong matawag nga bisyo ang pagpangutang kay naay uban gusto lang makautang, maayo ra ba kong tarong mobayad, aw dili gani mobayad mao pay masuko kong paninglan.

Dili man hinuon tanan kay naay mangutang tungod kay gikinahanglan gyud kaayo ang kwarta ug wala nay kapadulngan adto na sa tigpatanto moderetso.

Karong panahona dili lang sa Turko mangutang ang mga tawo kay naay mas sayon kaayo, kanang mga lending app, diin ipaagi lang sa online application makapangutang na ka.

Maayo ra ba kaayo kini og convincing strategy nga makadani gyud sa mga palautang. Apan mausab man ang ilang estratihiya kong tigpaningil na.

Kong mapakyas ka sa imong petsa sa pagbayad awayon naman ka ug hulgaon nga pakauwawan sa tanan nimong kaila. Pastilan tinud-on ra gyud kong dili makabayad.

Ang nakaparat kay wala nay mahimo ang nangutang sanglit nahatag naman niya tanan ang personal data ngadto sa tigpautang, igo nalang sa pag-agwanta sa kauwaw ug sa stress, gani ang uban makahuna huna nalang sa paghikog.

Usa kini sa gitutokan karon sa anti-cybercrime division sa mga law enforcement agencies lakip na ang National Bureau of Investigation.

Naghitak ang ingon niini karon nga modus ilabi na kadtong mga tigpautang nga illegal ang operasyon ug lisod matultolan sa mga tinugyanan sa balaud kay magkinahanglan pa man og cyber warrant ayha sila makalihok.

Apan kong lehitimo ang lending company sayon ra kining magukod ang ilang gihimo sa mga nangutang kanila.

Samtang ato kunong balihon ang sitwasyon, ang tigpautang maoy giutangan ug dili pa gyud bayran syempre masuko gyud ka labi na og unya unyaon ka ra.

Dili seguro ka mapakaulawan kong kabalo sad ka mohuna huna sa imong bayranan kay imo naman na nga napahimuslan dili pud pwede nga kalimtan nalang.

Pero dili pud mahimong laktoron ang balaod kong dili siya mobayad ikiha ug dili pinaagi sa pagpakauwaw ngadto sa social media o pinaagi sa pagkontak sa tanan nga kaila.

Sa mga tigpautang hinumdumi nga naay balaod nga mahimong gamiton sa pag gukod sa mga molapas niini, samtang sa mga mahilig mangutang, bayari intawon aron dili mo maulawan kay basin gamiton nalang ang balaod aron makalingkawas sa utang.

Timan-i lang ang pagpangutang nga dili bayran sama kana sa pagpanulis sa atubangan.