Katekesis No. 6

Pagkabalaan Tawag Natong Tanan

Pasiuna

Pagkinabuhi hinuon kamo nga balaan kay balaan man ang Dios nga nagtawag kaninyo. Ang kasulatan nag-ingon, “Pagbalaan kamo kay ako Balaan man.” (1 Ped. 1;15-16)

Kahulogan sa pulong BALAAN

Hagios- Griyego

Sanctus- Latin

Holy- English

Santo- Filipino

Balaan- Cebuano

Pagkabalaan diha sa pagtulon-an sa simbahan

Ang Pagkabalaan hulagway sa usa ka maayong kahimtang diin ang usa ka tawo tinabangan sa grasya sa Dios ug sa Espiritu Santo ug diha sa kinabuhi nga maampoon ang nahimong gawasnon sa bisan unsang dautan ug sala.

Kahimtang kini sa pagpuyo diha sa presensiya sa Dios. Sa Hebrew gitawag kini og Shekinah kun Presensiya sa Dios.

Tawag natong tanan ang kinabuhing Balaan ingon  nga ang atong Langitnong Amahan hingpit ug Balaan. (cf. Mt. 5;48).

Ang tawag sa kabalaan mao man ang kahingpitan sa kinabuhing Kristohanon, diin atong gisul-ob ang bag-ong pagkatawo diha ni Kristo Jesus.

Kini tungod kay si Kristo Jesus mao man ang nisalamin sa Kahingpitan sa Dios.

Matud pang San Jose Maria Escriva, ang kinabuhing balaan maoyh makapahimo natong alter Christus kun laing Kristo alang sa uban.  Tawag nato kining tanan bata, hamtong, pari o layko.

Gimbut-an sa Dios nga ang tawo mamahimong mahisama sa iyang anak diha sa himaya. Sila nga nahigugma Kaniya. (CCC 2013).

Gitawag kita sa kahingpitan ingon nga ang atong Amahan nga Langitnon hingpit (CCC 2014)

Ang paglambo sa atong Espirituhanong kinabuhi gitumong man alang sa kahiusan diha kang Kristo pinaagi sa kinabuhing Sakramental sa Simbahan. (CCC 2014).

Ang kinabuhing Santos dili nato malain sa Krus ni Kristo. (CCC 2015)

Ingon nga Katilingban nagpanaw kita padulong nianang kahingpitan ngadto sa  Langitnong Jerusalem. (CCC 2016)

Panapus

Isip Simbahan nahuptan nato kining tutuulo ka mga Hulagway

Ang Simbahan nga Nagpanaw pa kun Church Militant mao man kita nga ania padayong naningkamot dinhi sa inadlaw adlaw natong panaw. Ang Simbahan nga Nag-antos kun ang Purgatoryo mao kadtong mga kaigsuonan nato nga tungod sa ilang dili pa hingpit nga kinabuhi kinahanglang pagalimpiyohan pinaagi sa makalinis nga kalayo sa purgatoryo.

Ang Simbahan nga Mahimayaon mao kadtong mga Igsuon nga human masulayi sa ilang kinabuhi napamatud-an nga angayang mosulod ug makig-uban sa Dios ang Santos sa tanang mga santos.