Pagbaraw sa mga feeling hawod
Kon apil ka sa administrasyon nga gipasanginlang laktod nga nipatay og kapin sa 30,000 sa kampanya nga, wa kabadlong, nakapasamot hinuon sa ilegal nga drugas; ug ang pangulo, imbes tulisukon, nakakuha sa kinatas-ang popularidad, magpadayon sab tingali og pataka og pasangil bisan nahuman nang termino.
Kon apil ka sa administrasyon nga wa kahunong nipalapad hinuon sa pangurakot sa higanteng mga transaksiyon bisan taliwa sa pandemya sa Covid-19, pero way nasilotan kay igo lang gitaktak nga way kiha ang mga nasakpan, makumbinser sab tingali nga di ka madutlan sa balaod.
* * *
Kon apil ka sa kampanya nga nipakatap sa way kinutoban nga mga pamakak ug pangilad pagpahumot sa lang-og nga diktadura ug pagpakauwaw sa ligdong nga mga kaatbang pero nakakuha gihapon og makabungog nga mayoriya sa eleksiyon, magpatuyang sab tingali ka og pangangkon bisan unsay maibot gikan sa tumoy sa imong buhok.
Kon apil ka sa bag-ong administrasyon nga nagsige lang og paukyab atubangan sa lapad nga kalisod sa katawhan pero makalusot bisan sa makauuwaw nga bulilyaso sa importasyon sa asukar, matental sab tingali pagtuo nga pagpamakak ray inyong dag-anan.
* * *
Kon nakita nimong oposisyon nga nangamote kay ang tanang kuwarta imong nasipong ug gipabaha pagpamalit og mga boto sa niaging eleksiyon ug ang kinadak-ang negosyante nag-ilogay pagtanyag og suporta sa umaabot pang mga eleksiyon, makahimo sab tingali sa wa kinahanglanang pagawal sama sa pagpangilog og yuta nga gigamit pagtambal sa mga masakiton ug ubang mapuslanong katuyoan.
Kon nabatyagan nga hingpit ang imong gahom ug way makababag bisan unsay himuon, magpabungul-bungol sab tingali sa mabuot nga mga tambag ug pagbadlong.
* * *
Di malalis ang mga timaan sa kahubog sa gahom. Nagtuong sila ray hawod ug mapahilom si bisan kinsang mosukwahi nila. Maong niinsistir nga way media organization nga mohagit nila. Ni mga huwes nga may kaisog ug independenteng panghunahuna paghukom sa mga kaso.
Magpadayon ang ilang panghasi kon way mopahinumdom nga suluguon ra sila. Nga duna pay mas hawod nila. Nga maoy nagbayad sa ilang suholan ug benepisyo. Nga maoy naghago sa kuwarta nga gipasimang gikan sa mga proyekto ngadto sa pribadong bolsa. Pero makabaraw pa bang mga magbubuhis. Kon mayoriya nila nailad ug napalit na?
* * *
- Latest
