Pagpangiyugpos sa La Niña
Ang super typhoon Karding nga nikusukuso sa Luzon apil na sa Metro Manila mao nay ikatulong sunudsunod nga kusog nga bagyo nga nakasud sa Philippine Area of Responsibility (PAR) karong buwana. Iyang gisundan ang super typhoon Henry sa unang semana sa Septiyembre ug ang super typhoon Henry sa ikaduhang semana.
Sa nangaging katuigan tagsa rang super typhoons nga nakasud sa nasud. Ang super typhoon Odette sa Disyembre sa niaging tuig ug ang super typhoon Yolanda niadtong 2013, nga nakamugna sa labing lapad nga kadaot, giuwang og dul-an usa ka dekada.
* * *
Si retired Pagasa Visayas Director Oscar Tabada ang nipasidaan sa mga Sugbuanon nga 95% ang kahigayonan sa pagkahitabo sa La Niña karong buwana. Nga mahimong molungtad hangtod sa unang mga buwan sa sunod tuig 2023. Nipasabot si Tabada nga gawas sa mas daghang uwan sa La Niña mapaabot sang mosunod:
• Mas daghang bagyo ang makasud sa PAR;
• Mas kusog ang mosunod nga mga bagyo; ug
• Ang mga bagyo sa kataposang tulo ka buwan sa tuig kasagaran magsugod sa Kabisay-an ug Mindanao ug dako ang kahigayonan nga makaigo sa Sugbo.
* * *
Ang pasidaan ni Tabada gisundan dayon og tulo ka sunudsunod nga super typhoons, usa kada semana sa unang tulo ka semana sa Septiyembre. Ang katukma sa iyang kasayuran maoy makapamingaw sa mga Sugbuanon sa wa pa moretiro si Tabada sa Pagasa.
Kay ang mga napuli niya sa Pagasa sa Mactan ug sa Kabisay-an kutob ra sa pagbasa sa forecasts nga hinimo sa ilang ulohang upisina. Mahimong way kakugi, o wa gyoy katakos, sa pagpasabot nato sa mga implikasyon sa pag-usab-usab sa kahimtang sa panahon.
* * *
Ang mas dakong trahedya mao ang paglinguglingog lang sa lokal ug nasudnong mga opisyal sa gobyerno sa mga pasidaan sa mas daghan, mas lapad ug mas kusog nga bagyo, uwan, baha ug pagdahili sa yuta tungod sa global warming.
Nagsige lang gihapon og hisgot sa ilang komprehensibo nga drainage plans, sa panginahanglan sa binilyon ka pesos aron pagpalambo sa drainage system, pagpalawom ug paghawan pagbalik sa mga sapa ug pagbalhin sa nameligrong mga molupyo ngadto sa mas luwas nga mga lugar. Sama sa naandan, unya pa manguros kon makilatan na.
* * *
- Latest
