EDITORYAL - Mangitngit nga mga karsada

Daghan pa kaayong mga karsada nga kaniadto kompleto og mga sugang dagitabnon panahon sa kagabhion nga nangaguba sa bagyong Odette ang wala pa gihapon mabalik hangtud karon. Ang uban niini, daan ng kulang gyud og suga hangtud karon wala lang gihapon nabutangan.

Kaning pagpasuga sa kadalanan panahon sa kagabhion responsabilidad man kini sa mga local government units. Apan wala sila magpakabana niini. Makasabot ra tingali ang katawhan kun ang ilang lugar dili kaayo daghan og mga tawo nga magtikaw-tikaw ini og gabii.

Apan duna gyuy mga lugar dinhi mismo sa Metro Cebu ug sa mga kasikbit nga mga lungsod nga malambuon na unta ug daghang mga tawo bisan gabii nga nanginabuhi, wala man gihapon hatagi og pagtagad suga sa ilang kadalanan.

Anhi sab sa mga dalan nga menus kaayo og sugang dagitabnon sagad mahitabo ang mga krimen ug disgrasya sa mga sakyanan.

Kay diha sa mga ngitngit nga mga karsada matago man ang krimen ug maglisod sab ang ubang mga motorista paganinaw sa unahan bisan duna pa silay headlights maong duna gyuy magkabanggaanay.

Dili makompleto ang pagangkon sa gitawag nga malambuon ang usa ka lugar kun ini og kagabii ngiob na ang kadalanan niini ug daghang mga krimen o aksidenteng nahitabo sa maong mga dalan.

Angay tingaling tutokan kini sa mga incumbent officials sa nagkalainlaing mga Sangguniang Panglungsod hasta sa ilang mga mayor. Kung walay ikabayad sa kuryente matag buwan, daghan namang mga baligya karon nga solar lights.

Aning paagiha, poste nalay gastohan sa LGU kay ang solar lamps wala namay bill nga kinahanglang bayran kay libre kini ug abunda ang enerhiya sa adlaw.

Nganong dili man kini iduso sa mga utokan ug banggiitang mga konsehales sa nagkalain-laing mga LGUs?  Pinaagi sa sugang dagitab panahon sa kagabhion, malugwayan pa ang oras sa mga nanginabuhi sa karsada bisan gabii na, ug makaayo kini sa ekonomiya sa maong mga lugar.