Pagbuyag sa kada bakak
Mahimo ra gyod untang di pakapinan ang istorya. Mahimo ra gyong balikbalikon pagdeklarar og kadaogan: Nga wa lang maka-diskurso sa United Nations General Assembly (UNGA), nakasulti pa gyod ni Presidente Ferdinand Marcos Jr. ang labing gamhanang tawo sa tibuok kalibotan nga si US President Joe Biden.
Pero tinuod ang pahimatngon sa katiguwangan. Nga ang mga bakakon, sama sa mga bentahuso, makasugod na gani maglisod na sa paghunong. Ambot nganong nangilad pa gyod ang Malakanyang nga sa 48 ka heads of state nga nihangyo nga makigtagbo ni Biden, si Marcos ray giatubang.
* * *
Nagtuo tingali sila nga tapolan ang media sa pagsusi ug kalawaton na lang ang ilang pangangkon. Nagtuo tingali nga ang mga balita sa ubang kanasuran kansang mga lider nakigtagbo sab ni Biden sa New York di mahibaw-an dinhi sa ato.
Nisalig tingali nga ang nagbaha nga mga pagdayeg sa ilang trolls nga ang pagduaw ni Marcos Jr. sa Estados Unidos maoy labing malampuson sukad masukad (o sukad sa golden years sa iyang amahan), makapuno na sa atensiyon sa mga Pilipinhon ug di na sila magtagad sa sukwahi nga kasayuran.
* * *
Pero ang website sa White House nilista ug nipakita sa mga letrato sa ubang heads of state nga mas una pang nakigtigom ni Biden sa sidelines sa UNGA: French President Emmanuel Macron, British Prime Minister Liz Truss, South Korean President Yoon Suk Yeol, Japanese Prime Minister Fumio Kishida ug Kenyan President William Ruto.
Imbes mangayo og pasaylo nga nasakpan sa bakak, ang Malakanyang nisuway pa gyod paglusot: Ang ubang mga tigom dugay rang natakda; ang kang Marcos Jr. rang hangyo ang bag-ong gisanong.
* * *
Pero nahibawong administrasyon nga di sila kinahanglang mangayo og pasaylo. Di gani angayng magtagad mabunggo ba o makalusot ang ilang pangilad. Nagtungkawo sila sa gahom ug ang minilyon nga ilang nadani sa niaging eleksiyon maoy mosegurong magpadayon sila sa pagpanghawod sa mosunod nga unom ka tuig. Ug lapas pa.
Unsay atong mahimo? Sigehan nato sila og buyag. Nga nahibawo ta sa kada nila pamakak. Pangabuso sa gahom. Pagwaldas sa buhis. Pagyatak sa atong mga katungod. Pagpakuwaw sa atong nasud. Sa mosunod nga unom ka tuig. Ug, simbako, layo ra to, lapas pa.
* * *
- Latest
