Si Dives ug si Lazaro

Septiyembre 25, 2O22: Ikakawhaag-unom nga Domingo sulod sa tuig

Mga pagbasa: Am. 6;1,4-7/Sal. 146/1 Tim. 6;11-16/Lk. 16;19-31

Sa tradisyon ang ngalan nga Dives linatin sa pulong dato. Sa laktod sugilanon kini sa Dato ug ni Lazaro. Wala gitataw dinhi sa ebanghelyo kun gimaltrato ba ni Dives si Lazaro. Samtang siya nagkaon ug nag-enjoy sa iyang kinabuhi uban sa iyang dinato nga pagkinabuhi, si Lazaro didto sa gawas sa ganghaan ang nagpaabot nga kaluy-an aron makakaon sa mumho gikan sa talad kan-anan sa maong dato.

Bugtong mga iro lamang ang nagpunay og tilap sa iyang mga samad ug mga nuka. Hangtud nga namatay siya ug gidala ngadto sa kiliran ni Abraham. Wala madugay ang dato namatay usab ug gilubong sa paagi nga tingali puno sa pagtahud apan ang iyang kalag nilahos ngadto sa kalayo.

Ulahi na sa dihang nakita niya ang kabus nga si Lazaro didto sa kiliran ni Abraham. Mahangyoon siya kang Abraham nga mahatagan siya og gamay nga tubig aron matagbaw ang iyang kauhaw apan ang dakong bung-aw maoy nakababag kanila.

Gihangyo niya nga pabalikon si Lazaro sa kalibutan aron mapasidan-an ang iyang mga kaliwatan aron dili sila mahiadto sa iyang kasakitan apan sa gihapon siya nabalibaran….

Indifferentism

Mas maayo pa kuno nga magdumot ka sa tawo kaysa mamahimo kang indifferent. Ang pagdumot nahitabo tungod kay ang tawo nga imong gihigugma nakabuhat lamang og dautan nga tungod niini angayan kang maglagot. Apan ang tawo nga indifferent nahimong “walay pakialam” kun “manhid” sa iyang palibot ug sa mga tawo nga kaniya nagpalibot. Gitawag kini og indifferentism ug kun atong simplehon ang expression niini “Bahala na sila!”

Sin of Omission

Daghan nato ang mahadlok sa sin of commission kun ang pagbuhat sa dili kinahanglang buhaton apan usahay nakasala kita sa sin of omission kun ang wala pagbuhat sa angayan nga buhaton.

Ning paagiha ang dato bisan kun wala siya’y gihimo nga dautan ngadto kang Lazaro apan wala pud matala nga duna siya’y gihimong maayo ngadto niini. Usahay ingon pud kita. Ang kakulang sa pagpakabana ngadto sa uban. sakit kini nato ug sa atong katilingban.

Narcissism

Si Narcisius sa mythology ang linalang nga nahigugma pag-ayo sa iyang kaugalingon. Nagpunay lang siya og sud-ong sa iyang kaugalingon sa tubig sa usa ka sapa. Ang maong buhat diin nabilanggo siya sa iyang kaugalingong kaambong maoy nakapahimo niyang biktima sa iyang kaugalingong mugna. Nahulog siya ug nalumos sa sapa.  Apan matud pa duol sa maong sapa nitubo ang nindot nga buwak. Ang narcissism usa ka matang sa panlantaw nga moral diin ang kaugalingon lamang ang gihunahuna, bahala na ang uban.

Hagit alang kanato:

1.  Karong semanaha bansaya ang usa ka altruistic nga buhat diin sa ginagmay nga paagi imong ipakita nga ikaw nagpakabana ngadto sa uban.

Pangamuyo/pagsaulog

Tulubagon

1.  Walay bisan kinsa nga mabuhi sa kaugalingon lamang/walay bisan kinsa nga mamatay sa kaugalingon lamang.

Koro

Kitang tanan adunay tulubagon sa usag-usa!

Kitang tanan gihiusa sa Dios nga Anak Niya!

2.  Sa atong pagpangga ug pag-alagad sa kaigsuonan/gisangyaw ta ang Maayong Balita sa kaluwasan!