Premature nga kasabotan

Gipirmahan ni Mayor Michael Rama ug sa mga opisyal sa New Sky Energy Philippines. Inc. niadtong Huwebes ang usa ka Joint Venture Agreement (JVA) alang sa katukuran sa usa ka waste-to-energy (WTE) facility dinhi sa dakbayan sa Sugbo.

Basi sa kasabotan obligahon sa New Sky Energy Philippines, Inc. nga syudad paglabay sa iyang basura didto sa tukoron niini nga WTE sulod sa 40 ka tuig sa mas mahal nga tipping fee. Ang syudad hinuon hatagan og bahin sa kita sa facility gikan sa laing mga local government units nga molabay sa ilang basura diin gibana-bana kunong mokita ang dakbayan og P24 milyones kada tuig.

Human sa 40 ka tuig ang kagamhanan na sa siyudad sa Sugbo maoy modumala sa operasyon sa maong facility. Masaligon ang mga opisyal sa dakbayan sa Sugbo nga makaayo ang maong kasabutan sa dakbayan labi pa sa pagkab-ot sa damgo sa mayor nga mahisama ang syudad sa Sugbo sa Singapore.

Sa ako nang gibalik-balik, way dautan nga mangandoy nga mahisama sa mga malamboong dapit. Apan angayan natong susihon og maayo tinuod ba nga makabintaha ang syudad sa maong kasabutan?

Alang nako, dakong binoang ang pagpirma ni Rama og JVA uban sa New Sky Energy Philippines, Inc. sanglit maisip ni nga premature. Ang abogado mismo sa kompaniya nga si Razilee Rae Ligaray miangkon sa dihang nahinabi sa mga reporters nga wala pa silay facility.

Gani nangita pa sila og dapit dinhi sa dakbayan nga ilang katukuran sa WTE facility ug ilang gilantaw ang Barangay Agsungot, Pamutan, Guba, ug Pardo nga posibling dapit nga ilang tukoran.

Giangkon sab ni Ligaray nga wala pa silay permit ug magsugod pa pagproseso sa mga gikinahanglan nga clearance human unya sa ilang pagpangita og dapit nga katukuran. Abogado si Rama, ang iyang bise mayor nga si Raymond Garcia abogado sab. Apan unsay nahitabo nganong nipiyong sila sa batakan kaayo nga requirement sa dili pa mosulod sa us aka kontrata?

Dili ba husto nga ang angayang gihimo sa mga opisyal sa dakbayan sa wala pa mopirma og kontrata mao ang pagsiguro una duna bay katakos ang kompaniya nga ilang gikasabot? Ug pagsiguro nga legal ang papeles sa ilang operasyon?

Unsaon pagpangangkon sa New Sky Energy nga duna silay legal nga mga papeles aron pag-operate og WTE facility nga wala pa man gani silay facility? Natural kay wa may facility wa pa sad silay permit sama sa Environmental Compliance Certificate gikan sa DENR.

Unsay kasigurohan nga makakuha sila og permit gikan sa DENR aron pagtukod og WTE facility sa mga dapit nga ilang gihisgutan? Unsay kasigurohan nga mosugot ang mga opisyal sa barangay ug ang mga molupyo mismo nga butangan sila niining maong klase sa facility?

Unsa ba kadako sa utang kabubut-on sa mga opisyal sa dakbayan sa Sugbo niining maong kompaniya? Hinaut dili ni bayad sa utang kabubot-on tungod sa tabang atol sa miaging eleksiyon.