Sulbad sa krisis pinaagi sa istorya
Nanimahong pataka ang pagduma sa administrasyon ni Presidente Ferdinand Marcos Jr. sa krisis sa asukar. Pero way bisan usa sa iyang politikanhong mga kaatbang ang nangahas sa pagbuyag nila. Gipatigbabaw tingali ang tradisyon sa pagpakahilom sa unang 100 ka adlaw sa bag-ong administrasyon.
Maong way lider sa oposisyon nga nisukwahi sa pangangkon nga artipisyal ang kanihit sa asukar. Nga normal ang suplay pero niburot ang presyo kay gitagoan sa mapahimuslanong mga negosyante ang tinoneladang asukar sa ilang mga bodega. Pero saligi ang kamatuoran nga may iyang mga paagi sa pagsulbong.
* * *
Human sa sunudsunod nga mga ronda sa mga bodega sa Metro Manila ug Luzon nga giangkon sa Malakanyang nga nakasakmit og smuggled nga asukar ug ubang kontrabando, sa way pagtug-an igo ba ang gidaghanon nga mapabaha sa merkado, makasulbad sa kanihit ug makapaubos sa presy, nakabuylo ang mga tigpamaba ni Marcos Jr. sa pagpasalig nga takos ang administrasyon sa pagsulbad sa problema.
Pero nagpabiling nihit ug mahal ang asukar. Wa na igkita ang mga produkto sa softdrinks ug juice sa mga tindahan. Nagnihit bisan ang para-sa-masa nga 3-in-1 coffee.
* * *
Daghang salamat sa Coca-Cola Beverages Philippines nga maoy nangahas sa pagpahibawo sa katawhan sa tinuod nga sitwasyon. Nisugod pinaagi sa joint statement uban sa mga karibal nga Pepsi-Cola Products Philippines ug ARC Refreshments Corporation sa pagdason sa kanihit sa asukar nga nakaigo na sa ilang operasyon.
Dayon nagbinugtong na lang sa pagbisto og dugang detalye: Nga ang ilang industriya nagkinahanglan og 450,000 metric tons sa premium refined sugar aron mahibalik ang 100% nga kapasidad sa ilang mga planta.
* * *
Dihang giisnab gihapon sa Malakanyang ang mga pasumbingay, gisirhan sa Coca-Cola ang pipila sa iyang mga planta uban ang higanteng tarpaulins nga nagpasabot sa kakuwang sa asukar. Mas katuohan ang ilang mensahe nga duna nay mga nakulban og mga kaldero tungod sa krisis.
Ambot pila na ka planta ang gitak-opan. Pero apil sa mga lugar nga labing unang nawad-an sa operasyon sa Coca-Cola mao ang Davao City, pinuy-anan ni Bise Presidente Sara Duterte Carpio, ug Naga City, pinuy-anan ni kanhi Bise Presidente Leni Robredo. Ambot magpaugat ba gihapon ang Malakanyang pagsulbad sa krisis pinaagi lang sa istorya.
* * *
- Latest
