Paring dilawan habolan

Adunay mga paring dilawan ug pinklawan ang wala gihapon maka-move on bisag gipilde na ni kanhi Senador ug karon Pangulong Bongbong Marcos (PBBM) ang ilang pinanggang manok, Leni Robredo, sa miaging piniliay.

Subo palandungon, nga panahon sa misa, kanunay isulit-sangyaw sa kaparian: “Ipakita ta ang panag-igsuonay ug panagdait!”, apan sila mismo, padayong mihimaraot sa nakadaog nga presidente, inay makighiusa-suporta sa mga programa niining makaayo sa katawhan.

Ultimong Maid in Malacañang (MIM) nga salida gisaway nila pag-ayo. Puwerte nilang labay’g lapok aron magkahugaw. Unya, may madre ug bishop pang mimandar-diktar sa publiko nga i-boycott ang pagtan-aw niini kay kuno mipausab sa orihinal nga kasaysayan.

Bisan niining pagsulat, diin mi-gross income nag P330M ang MIM, misamot ang ilang kainggit. Labihan nilang nakabunal sa pagkinomentariyo batok sa nakuhang pagdayeg sa kinatibuk-ang unod sa MIM ug ni direktor Darryl Yap, gikan sa milyonmilyong moviegoers sulod ug gawas sa atong nasod, kinsa nahigugma pagsamot sa mga Marcos ug nakat-on sa pagkasuko ngadto sa mga Aquino.

Wala kini ikahimuot sa mga Dilawang pari, kinsa naglagot ni Yap. Usa kanila mao si Fr. Benny ‘Nonong’ Tuazon, diin sa ilang pagtinubagay ni Yap sa social media bahin sa church donation, indirekta pang gitirahan si PBBM, pinaagi sa pag-ingon ngadto sa direktor: “Baka lang nagkakalimutan. May 203B (and counting) na dapat singilin.” Ang real estate tax controversy sa Marcos family maoy ipasabot sa pari.

Miaso ang pari dihang giingnan ni Yap: “Kung talagang gusto ninyong tumutulong sa mga mahirap, gawin nyong libre ang mga Catholic private schools. Ipantay nyo sa public ang suweldo sa mga guro nyo. Yun, ang tunay na malasakit!”

Ug mibalos-tubag si Fr. Benny: “Bakit daw hindi gawing libre ang Catholic schools? Hmmm. Patulan natin. Gusto mong libre ang Catholic schools? Mag-donate ka. If not, let part of taxes paid to the government be given as support to Catholic schools.”

Dinhi makita unsa ka habolan ang pinulongan ni Fr. Benny. Pinulongan nga makaguba sa imahe sa simbahang Katoliko ug makaangin sa nagbinuotang kaparian, kinsa puwerting paningkamot nga dili mapiksan sa kahugaw sa politika ang gisul-ob nilang puting sotana.

Unta, moipon na si Fr. Benny sa panon sa mga putling karnero.