EDITORYAL- Andam na ba gyud sa klase?

All systems go. Mao kini ang gipahibalo sa Department of Education may kalabotan sa umaabot nga pagbalik sa klase sa sunod semana.

Kini bisan pa man sa daghang mga kakulangon nga dayag kaayong makita diha mismo sa mga edipisyo sa nagkalain-laing mga tunghaan sa bisan asang suok sa nasud.

Sumala pa nga adunay kakulangon nga 90 mil ka mga lawak saringan sa tibuok nasud, ug kini ubos lang sa ahensiya sa DepEd o gikan sa pangpublikong kindergarten hangtud sa senior high school.

Kaning kakulangon bunga kini sa duha ka tuig nga walay nakaatiman sa mga karaang mga school buildings tungod sa gipatumang lockdowns ug nag online ug modular classes ang mga bata tungod sa pandemiya.

Ikaduha mao ang mga nangaguba nga mga eskuylahan tungod sa mga kalamidad sama sa bagyo ug linog diin liboan ka mga lawak ang nangaguba, kasagaran wala nay mga atop ug nangaguba ang linya sa kuryente ug daghan pang uban.

Apan bisan pa niini, nakita sa DepEd ubos sa pagdumala ni Vice Presidente Sara Duterte-Carpio nga gikinahanglan na gyud nga mobalik sa klase ang mga bata bisan unsa pay alert level status dala aning pandemiya.

Hinuon sa pagkakaron blended learning pa gihapon, dunay panagsang klase sa eskuylahan ug dunay mga adlaw nga pinaagi lang sa assignments o modules aron nga dili kaayo sila ma-expose.

Usa sa gikabalak-an sab sa ubang mga ginikanan mao ang ilang mga anak nga wala pa mabakunahi batok Covid-19 nga isagol sa mga batang bakunado na.

Hinuon subay sa balaod, dili rekisitos nga kinahanglang bakunado ang bata aron kini dawaton sa enrollment, gani ang pagpabakuna batok Covid-19 dili man compulsory o mandatory.

Basta siguraduhon lang sa mga ginikanan nga mosunod kanunay ilang anak sa health protocols samtang naa sa tunghaan ug kinahanglang seryusohon sa mga opisyales o tagdumala sa mga tunghaan ang pagpasunod niini.