Masakiton nga empleyado

Dear Atty. Divine,

Duna koy empleyado nga sickly kaayo magsige lang og absent. Wa ko masayud kun unsay iyang sakit  kay di man siya mosulti apan nahadlok ko nga basin matakdan unya niya ang ubang empleyado. So nakahuna-huna ko nga ako siyang i-terminate aron sab siya maka-focus sa iyang pagpatambal sa iyang sakit. Ang akong pangutana, pwede ba nako siya nga taktakon? Unsay proseso ug kinahanglan ba ko nga mobayad kaniya og separation pay kun ako siyang taktakon? Daghang salamat. —Vicky

Vicky,

Basi sa balaod, ang employer mamahimong mo-terminate sa empliyado sa iyang trabaho tungod sa sakit niini apan kinahanglan nga adunay proof ang employer nga ang sakit sa iyang empliyado dili na madala og tambal sud sa unom ka buwan ug kun magpadayon ang empliyado sa iyang trabaho hayan makapasamot kini sa iyang  sakit ug  mameligro sab nga matakdan ang  iyang mga kaubanan. Kinahanglan gyud nga Certification sa usa ka government doctor nga mopamatuod nga wa nay kaayuhan ang sakit sa empleyado o dili kini madala og tambal sud sa unom ka buwan. Kun makatuman ka sa maong rekisitos then pwede nimong taktakon apan kinahanglan gihapon ka nga moagi sa proseso. Ang una nimong buhaton mao ang paghatag og written notice sa empleyado labot sa imong plano pagtaktak kaniya gumikan sa iyang sakit aron sab paghatag og higayon sa imong empliyado nga makatubag niini.  Padad-an na sab nimo siya og written notice labot sa imong pag-terminate kaniya kun aduna ka nay final nga decision. Apan kinahanglan nga mobayad ka sa empleyado sa iyang separation pay nga equivalent to at least one-month salary or to one-half month salary for every year of service. Apan kun ang sakit sa imong empleyado matambalan ra sud sa unom ka buwan then dili mahimo nga imo siyang taktakon kondili imo lang siyang tugutan nga leave of absence aron siya makapatambal ug dawaton nimo siya pagbalik kun kini mamaayo na. Thank you and God Bless! —Atty. Divine

* * *

Alang sa inyong pangutana, ipadala lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.