^

Banat Opinyon

Pagtuon ni Marcos Jr. sa asukar

ARANGKADA - Leo Lastimosa - Banat

Wa nay laing kapilian si Presidente ug acting Agriculture Secretary Ferdinand Marcos Jr. Gawas sa pagpakita sa mga dokumento sa iyang pagtuon sa industriya sa asukar sa nasud. Nga nakapakumbinser niya nga way kanihit sa suplay. Sa pagka karon. Kon duna may kanihit unya pa sa Oktubre ning tuiga.

Kay sunudsunod nga gisukwahi ang iyang pangangkon sa mga mas suhito sa industriya, sa higanteng mga kompaniya nga napiang sa kakuwang sa asukar ug mga negosyanteng nihulagway nga dakong katalagman ang hingpit nga pagkawagtang sa asukar sa mosunod nga mga buwan.

* * *

Human napakita ni Agriculture Undersecretary Leocadio Sebastian, nga gipasanginlan sa Malakanyang nga ilegal nga nitugot sa importasyon sa 300,000 metric tons nga asukar, ang mga dokumento sa Sugar Regulatory Administration (SRA) nga nagpasidaan nga mahurot nang asukar karong buwana, mahimo bang ipakita ni Marcos Jr. ang iyang pagtuon?

Human napresentar ni Sebastian ang pagtuon sa Philippine Statistics Authority (PSA) ug National Economic and Development Authority (Neda) nga kapin sa 530,000 metric tons ang tinuig nga kakuwang sa asukar, mahimo bang ibisto sa presidente ang sukwahi niyang mga numero?

* * *

Human napugos sa pagluwat og hinugpong nga pamahayag ang tulo ka nagkaribal nga mga kompaniya sa softdrinks–Coca-Cola Beverages Philippines Inc., Pepsi-Cola Products Philippines Inc. ug ARC Refreshments Corp.--pagpasabot sa mga konsumidor nga kakuwang sa asukar ang nakapiang sa ilang produksiyon, mahimo bang pakalamahon sila sa presidente nga unya pa sa Oktubre mahurot ang asukar?

Human nitiyabaw ang mga konsumidor nga pila na ka semana nga nagnihit ang ilang paboritong tam-is nga mga mainom, mahimo bang pasabton sila sa presidente nga peke ang ilang problema?

* * *

Human nikumpisal si Robert Go, presidente sa Philippine Retailers Association Cebu Chapter, nga wa nay Coke, Pepsi ug Zest-O ug hapit na mahurot ang 3-in-1 coffee sa mga tindahan sa niaging duha na ka buwan, mahimo bang kurhian siya ni Marcos Jr. sa lahi niyang pagtuon?

Ug mahimo bang iapil og pasabot sa presidente kanus-ang iyang pagtuon? Sa wa pa ba matakdi sa Covid-19 human sa daghang parties? O human sa pagkanta og “You’ve Lost That Lovin’ Feelin’” samtang nahiagom ang nasud sa katalagman nga wa dayon maatiman?

* * *

[email protected]

FERDINAND MARCOS JR.

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with