Pagpakaaron-ingnon

Gidepensahan ni Mayor Michael Rama ang paghatag sa dakbayan sa Sugbo og P50 milyones nga hinabang sa mga dapit sa Luzon nga naapektuhan sa kusog nga linog niadtong katapusang semana sa Hulyo.

Mapasigarbohon ang mayor sa dakong hinabang nga personal niyang gihatud sa mga apektadong lugar niadtong weekend. Sigun ni Rama, dili siyay nagbuot sa maong kantidad apan nagpasalamat sa mga sakop sa konseho, gawas nilang Konsehal Nestor Archival, Sr. ug Mary Ann delos Santos nga mi-abstain, tungod kay wala kuno siya pakauwawi ug nisanong sa iyang gipangayo nga P50 milyones.

Kun di siyay nagbuot sa kantidad nganong nagpasalamat siya nga gihatag ang kantidad nga iyang gipangayo?

Dugang ni Rama nga ang kantidad simbolo kuno sa kasing-kasing sa mga Sugboanon ug nga mas maayo nga kita ang motabang kay sa kita maoy tabangan. Husto! Apan ang pagkamangihatagon angayang magsugod sa imong kaugalingon nga nataran ug mag-agad sa imong katakos.

Dili mahimong unahon nimo ang panginahanglan sa uban kay sa imong kaugalingon nga panginahanglan tungod kay ang paghimo sa ingon usa ka matang sa pagpakaaron-ingnon. Wala kay kalainan sa tawo nga magkumbira panahon sa pista aron magpakita sa iyang mga higala ug silingan nga adunahan bisan ang tinuod inutang ang iyang gigasto.

Dili dautan ang paghatag og hinabang, apan alang nako sobra ra ang P50 milyones tungod kay dunay mas dakong problema nga angayang gastohan ang dakbayan sa Sugbo. Tinguwan na ug dakong suliran ang pagbaha sa dakbayan nga angayang gahinan og dakong pundo pagsulbad niini.

Moabli na ang klase sunod semana ug karong Nobyembre mobalik na ang tanang tinun-an sa ilang classrooms alang sa face-to-face classes apan daghan pa sa mga tunghaan dinhi sa dakbayan ang wala pay atop.

Pipila ka adlaw ang milabay gipublikar sa The Freeman ang tunghaan diha sa Barangay Mabolo nga labihan pa kagusbat sa atop ug dili pa mahimong magamit sa mga estudyante.

Ang labing dakong baligho mao nga nagpakilimos si Rama gikan sa mga dagkong kompaniya aron siya tabangan nga mahuman ang Cebu City Medical Center (CCMC). Dako ang panginahanglan og kwarta sa dakbayan busa angayang magdaginot ang mga opisyal niini.

Daghan pa gani sa mga molupyo sa dakbayan nga nabiktima sa bagyong Odette niadtong Disyembre ang wala pa mahatagi og hinabang. Mas importante pa ba ni Rama ang pagpasiatab sa ubang mga dapit kay sa iyang kaugalingon nga mga konstitwente?

Way magbuot  og personal niyang kwarta ang gihatag isip hinabang. Apan kwarta intawon sa mga molupyo sa dakbayan iyang gigamit aron magpakaaron-ingnon tungod kay siya lagi maoy bag-ong presidente sa liga sa mga mayor sa mga dakbayan sa Pilipinas.