^

Banat Opinyon

Malubag pa’y buko sa kawayan

BALITAHOM - Atty. Jose Marie N. Poblete - Banat

Giawhag sa Cebu City Council ang MICS ug DPS nga paningkamotan nga mahimong stable ug kusog nga internet connectivity sa dakbayan isip usa sa mahinungdanon’g aspeto sa pagkab-ot sa damgo sa administrasyon nga mahimong susama sa Singapore ang dakbayan sa Sugbo.

Gawas sa internet connectivity, dili lamang mga kalamboan ang gilangkob sa maong damgo kon dili lakip usab ang pag-umol sa kina-iya ug kultura sa katawhan. Ang naulahi nga aspeto maoy dako’ng sagubangon tungod kay matud pa sa katigulangan, “Malubag pa’y buko sa kawayan, nungka ang kinaiya ug kultura sa katilingban”. Pagchure uy!

Mas dako’ng kadaot

Gibadlong sa COA and DOH gumikan sa kapalpakan sa maong ahensya sa pagpanghatag ug paggamit sa mga COVID-19 vaccines nga misangpot sa pag- expire ug pagka-usik sa maong mga bakuna. Mipasabot usab ang DOH nga ang mga nausik nga bakuna mao kadtong aduna’y mugbo nga mga shel life ingon man kadtong gipamalit sa mga pribadong sektor. Bisan unsa pa ang rason, dili matu-is ang kamatuoran nga adunay pag-usik-usik nga nahitabo. Dili na hinoon kini angay ikatingala. Matud pa gani sa akong amigo, “Mas dako pa ang kadaot nga mahimo sa gobyerno kon wala pa kini mag-usik-usik”. Pagkatoytoy!

Kahakog ang hinungdan

Gipaneguro ni Presidente Marcos sa mga food manufaturers nga ang kagamahanan naningkamot nga mapugngan ang pagsaka sa presyo sa asukal aron makapadayon usab sila sa ilang patigayon. Daghan ang matumbok nga hinungdan sa kamahal sa asukal, ug nag-una niini mao ang kahangol sa ubang negosyante kinsa mohimo og artificial shortage sa usa ka produkto aron lang mosaka ang presyo niini.

Walay kapuslanan ang mga hakog og hangol sa katilingban gawas lang kon sila mamatay na, kay piho man nga magbilin sila’g katigayonan alang niadtong mga tawo nga molubong kanila. Saoonz!

Paglikay sa kaakohan

Mi-insister ang mi-retiro nga SRA Administrator nga si Hermenegildo Serafica nga limpyo ang iyang konsensya taliwala sa kontrobersiya mahitungod sa importasyon sa 300,000 metric tons nga asukal. Dalaygon ang pagdemiter sa katungdanan kon adunay kahiwian nga masayran labi na gyud kon tinukmod sa delikadesa. Apan kon kini paglikay lang sa kaulawan, ang pagdemiter nahimong sayon nga gawsanan aron lamang maluwas sa kaakohan. Haum ang panultihon nga “Ang tanan’g empleyado naghatag og kamaya ug kalipay sa opisina; ang uban inig sulod nila ug ang uban usab, inig biya nila”. Fezteleern!

Nidaghan ang senior

Mipahimangno ang Commisision on Population sa pagpangandam alang sa nagkatigulang nga populasyon sa nasud. Nasayran usab nga nagka-diyotay ang populasyon sa mga batan-on nga Pinoy. Basin baya nidaghan ang mga senior citizen kay ang gibasehan sa POPCOM mao man ang pangedaron.

Kon gibase pa unta sa kabu-ot, basin diyotay ra ang mga senior citizen kay nagbinata pa man ang uban. Ginaingon baya nga “Ang pangedaron dili mahitungod sa numero, kon dili sa kinaiya”.

Dakong baligho nga sagad kanato ganahan nga mabuhi’g dugay apan dili ganahan nga tawgon og tiguwang, Madahaan!

SUGBO

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with