Tikasang timbangan kawat sa atubangan

Naglisod na ang kahimtang sa panginabuhi karon. Wala’g tuo nga gikastigo sa mga katalagman ang atong nasud. Bagyo, baha, linog, sunog ug land slide magpulipuli rag pagpanghasi sa nagkalainlaing dapit, miguba sa kabalayan, katanoman, kaumahan ug mikutlog daghang kinabuhi sa tawo, kinsa wala g’yuy bawot ning pagpaningil-bawos sa kinaiyahan human  abusohi-pasipad-i ang katahom niini sa tawo ra usab.

Ingon sa nakig-abin ang nagsunodsunod nga katalagman sa COVID-19 pandemic nga hapit motulo na ka tuig natong giantos. Gumikan niini, daghang nawad-ag trabaho. Busa, hapit na lamang mabuak ang ulo sa hingtungdan unsay buhaton nga padayon niyang mapakaon iyang pamilya?

Pipila kanila, namunit na lamang og mga biyang basiyo sa mineral water ug ubang butang sulod sa basurahan nga mahimo pang mapatimbang sa ubos kaayong presyo didto sa timbangan sa mga negosyanteng mamalitay niini.

Ang pait kon ang maong timbangan, dili patas. Basig gi-adjust pabor sa mga negosyante? Sama sa gibuhat sa pipila ka tindera sa merkado publiko, diin nagtener og mga tikasang timbangan. Diin, dato ug pobre, tanan mabiktima!

Niining bag-o, mga tikasang timbangan sa Consolacion Public Market nasakpan sa gihimong surprise inspection sa mga otoridad sa kagamhanan. Gipangsakmit tanang tikasang timbangan nga pulos gihilabtan ang na-calibrate na pinaagi sa pagtamper-gisi sa municipal seal.

Pero subo palandungon. Kay matud pa sa balita, igo rang gitambagan sa mga otoridad ang mga nasakpang tindera nga dili pahilabtan ang unsay na-calibrate nang mga timbangan kay basin kunog mag-atubang silag problema. Mao ra ba kini ang gibuhat sa mga otoridad?

Dili ba may penalty man kini nga P1,000-fine and/or 1 ka tuig nga pagkabilanggo base sa karaang balaod?  Kana, kon wala pa iimplementar ang naaprobahan nang House Bill 3255 sa Kongreso, diin ang silot gipatas-an: P50K-P300K-fine and/or pagkabilanggo hangtod 5 years.

Dapat, hugtanon kining iimplementar. Ang paghupot og tikasang timbangan sama ra nga ang kustomer gikawatan sa atubangan. Busa, dili mahimong verbal reprimand ra ang i-sanction sa nasakpan. Kinahanglang iaplay gyod unsay nalatid sa balaod.

Mao diay, nga hangtod karon naa gihapoy mogamit og tikasang timbangan sa mga merkado. Kay ang tinuorayng problema, wala sa tindera. Kon dili, naa sa mananakop. Unta, matambalan na kining maong sakit.