Tinuoray’ng serbisyo

Nindot kaayo og kalamboan ang lakaw ni Cebu City Mayor Michael Rama sa pag-adto niya sa Manila kaniadtong miaging semana kay gisaaran siya ni business tycoon Manny Pangilinan nga tabangan pagpalambo sa Cebu City Medical Center.

Nalipay kaayo ko pagkabasa sa balita nga ang bilyonaryo nga si Manny Pangilinan misaad nga mogasto og P100 million aron pagpahuman og laing usa ka andana sa CCMC. Gihimo niya ang pasalig sa panagtagbo nila ni Rama didto sa Manila.

Unya, duna sa’y laing grupo sa mga magapatigayon nga misaad sab nga magtampo-tampo sila aron nga ilang matigum ang P100 million nga magamit sa pagpatukod og lain pa nga andana sa ospital.

Gitawag kini ni Rama nga “Poor Man’s Hospital with Rich Man’s Services, Love, Care, Compassion Assured.”

Damgo gyud ni Mayor Rama nga mapatukod ang napulo ka andana nga ospital, ug nga unta mahitsas kini sa kagamitan aron nga ang mga taga siyudad sa Sugbo dili na kinahanglang moadto pa sa mga private hospital.

Nakahinumdom ko nga si Rama miadto gani gyud sa mga dapit sa United States og nagpakiluoy sa mga magpapatigayon nga makatabang pagtukod sa bag-ong CCMC.

Apan kay napulihan man siya sa pwesto pagka 2016 mao nga ang mga gisaad nga tabang wa na mahimoi og follow-up ug nahisama sa aso nga takulahaw lang nahanaw.

Lisud gyud kon ang siyudad way kaugalingong ospital nga hitsas sa mga tambal kay ang mga kabus, sama nako, maproblema tawon kon magkinahanglan na og pag-atiman sa panglawas.

Ang ako lang awhag nga unta, magahinan gyud og igong tambal ang maong ospital kay mag-unsa man kon dunay ospital, pero wa diay tambal?

* * *

Tan-aw nako no, kon ang tanang mga empleyado sa Cebu City government, motuman lang gyud sa tagsa-tagsa nila ka mga tahas, molambo gyud ang atong siyudad.

Ang una gyud mao nga ang mga kawani sa Treasurer’s Office maninguha gyud aron mapadak-an ang koleksyon sa revenue.

Unya, ang lainlaing mga departamento nga gitugyanan paghimo’g mga proyekto, mohimo gyud niini nga dili mangurakot aron nga ang kwarta adto gyud igasto sa proyekto.

Ang ubang kawani nga gitugyanan sa paghatag og mga serbisyo, motuman gyud, sama sa DEPW nga motan-aw gyud sa pagsulbad sa pagbaha.

Unya, ang mga sakop sa Cebu City Transportation Office maninguha gyud nga mapahapsay ang dagan sa mga sakyanan, ug ang DPS maningkamot nga mahipos gyud dayon ang basura.

Ang Parks ang Playground Office moatiman sa pagpanindot sa mga plaza, islands sa mga karsada. Mahimo kaha ni ninyo?