EDITORYAL-Proteksyon sa kabataan ang importante

Hugot na nga gipatuman sa Cebu City ang curfew ordinance niini alang sa mga menor de edad aron kapugngan ang mga krimen nga naglambigit sa mga kabataan. Daghan ang nalipay niini ilabi na ang mga ginikanan nga naugtas og disiplina sa ilang mga anak nga magsige og lighot og ikyas aron molaag kauban ang ilang mga barkada. Ang maong ordinansa nagmando nga alas-10 sa gabii hangtud sa alas-4 sa kaadlawon kinahanglang wala nay mga menor de edad o 18-anyos paubos diha sa kadalanan ug gawas sa ilang mga panimalay. Nabantayan nga sukad nga gilibkas ang mga restriksyon nga gipatuman tungod sa pandemiya, midaghan sab ang mga tawo diha sa kadalanan bisan disoras sa gabii, lakip niini ang mga menor de edad nga daw nakabuhi sa toril.

Karon nga magsugod na ang klase, importante kaayo sa mga bata ang saktong pahuway aron motuhop sa ilang utok ang ilang mga leksyon. Busa  makaayo para kanila kining maong ordinansa. Dako og papel ang mga barangay officials niini, kay sila maoy nasuhito sa ilang tagsatagsa ka mga dapit kun asa magestambayan kining mga managbarkadang menor de edad. Dili kinahanglang sikupon dayon ang mga bata aron sila disiplinahon tungod kay maka traumatized kini kanila. Maayong ibalik ang rekorida pagpahibalo bahin sa curfew aron dili makalitan ang komunidad. Aning paagiha sab ma-inform ang mga ginikanan bahin niini ug sila na mismo maoy mohipos sa ilang mga anak sa dili pa ang alas-10 sa gabii.

Dili maayong trataron nga mga kriminal ang mga batang naglaruy-laroy kay anhi magsugod ang child abuse kun ang mga mamadlong mogamit og pagpanghadlok.

Husto sab nga ipatawag ang mga ginikanan sa mga batang ma-rescue, apan kinahanglang sa diplomatikong paagi nga dili makainsulto sa mga ginikanan ug mao hinuoy pahimungtan ilang mga anak. Una sa tanan, ang proteksyon sa kabataan ang tumong niining curfew ordinance ug dili aron maghawod ang mga tigbadlong, sanglit kun ipaagi sa inisog, dunay posibilidad nga gamitan og pisikal nga disiplina sa mga ginikanan ang ilang mga badlungong anak aron lang motuman sa maong ordinansa.