Kalainan ni PRRD ug PBBM
Ang War on Drugs nagpadayon. Ang nakalahi lang, kay kon kaniadto plastadong ianunsiyo ni kanhi Presidente Rodrigo Roa Duterte (PRRD) nga gikasilagan niya ang drugas ug gisugnoran niya pirme ang kasingkasing sa tanang kapolisan aron magkayo kining mopuhag sa illegal drugs syndicate, si karon Pangulo Bongbong Marcos (PBBM) pinabugnaw ang gigamit niining taktika.
Sa ika 121 nga Police Service anniversary, gipahinumdoman ni PBBM ang kapolisan nga ampingan ang ilang integridad diha sa ilang paglutos sa mga daotang elemento, diin dili nila iabuso ang balaod gamit ang ilang uniporme. Kon dili, sundon ang nalatid nga balaod sa atong konstitusiyon.
Sa administrasiyon ni PRRD, ang Ozamiz City nga gilubgan sa gahamang mayor ug pamilya sa mga Parojinog, kinsa nalakip sa listahan sa mga drug lords nga gigunitan ni PRRD, napukan gayod dihang iyang gipadala si Police Chief Inspector Jovie Espinido sa maong dapit, kinsa maoy gisangonan sa pagsumpo niini.
Ning pagpamunoan ni PBBM, usa ka Maharlika, iladong vlogger ug suod higala sa naprisong Dr. Chiao Tiao Yumol, kinsa giingong mipatay ni kanhi Lamitan City Mayor Rose Furigay ug sa lain pang duha, nanawagan ni PBBM nga sutaon unsa ka tinuod ang gisulti ni Dr. Yumol kaniya, diin ang Lamitan City hagbay ra kunong gipuy-an sa mga drug lords nga Furigay?
Diin matud pa niya, si Yumol biktima sa inhustisya. Hinungdang napugos pagkumkom sa atong balaod. Wala konsentiha ni Maharlika ang krimeng nabuhat sa doktor. Dapat lang, silotan katugbang sa nahimo niining salaod.
Pero, dapat susihon usab sa kagamhanan kon tinuoray bang gidominar sa pamilyang Furigay ang Lamitan City, diin ang balaod sa hukmanan dili patas ug mao kunoy nakapahimong kriminal sa buotang Dr. Yumol.
Gipadala-abot na ni Maharlika kining maong kontrobersiya ngadto sa mga kadagkoan sa gobiyerno, kinsa gituohan niyang makatabang. Apan hangtod ning pagsulat, wala kunoy bisan usang milihok.
Nagpasabot ba kini, nga ang gipang-appoint ni PBBM sa mga hingtungdang ahensiya, kulang sa kaisog pagsuporta sa War on Drugs ni PBBM, or si PBBM ba kaha mismo, ang may kulang sa puwersa?
Dinhi molutaw ang kalainan ni PRRD ug PBBM. Si PRRD hard (buhing bato, puthaw.) Samtang si PBBM soft (mamon, espongha).
- Latest