Madato sunod tuig

Segun sa bag-ong datos sa Philippine Statistics Authority, ang balor sa produksyon sa agriculture ug fisheries mikunhod sa 2nd quarter ni’ng tuiga.  Tungod sa epekto sa bagyong Odette, inubanan sa padayong pagtaas sa presyo sa mga gamit sa panguma ug panagat, gipas-an sa maong sektor ang bug-at nga buluhaton pagbalanse sa panginahanglan sa pagkaon sa nasud ug pagsagubang sa naasoy’ng mga suliran.  Taliwala sa mga pag-ulog-ulog nga sila ang pundasyon sa kabulahanan sa nasud, dayag ang kakulang sa pag-atiman sa gobiyerno sa sektor sa mga mag-uuma ug mananagat.  Haum ang komedya nga, “Ang mga mag-uuma ug mananagat, ma-datô na gyud sunod tuig.”  Fezteleern!

Nahanaw ang pangandoy

Namahayag ang Department of Agriculture nga wala nay mapalit nga mga puti nga sibuyas-bombay sa mga kamerkadohan sa Metro Manila.  Tungod niini, naglaraw ang kagamhanan nga mo-angkat na lang sa gawas sa nasud og mga sibuyas-bombay.  Inay suportahan sa hingpit ang sektor sa agrikultura, dakong tanghaga ang pagsagop sa import policy sa gobiyerno.  Hingpit na ba’ng nahanaw ang atong pangandoy nga “motanom kita sa atong pagkaon ug mogama sa atong panginahanglan”?  Mohilak ang tawo samtang nagpanit sa siboyas-bombay; mohilak na usab kita kay wala na sa merkado ang sibuyas-bombay. Paleho la!

Ipasundayag ang baligya

Matud pa sa Meta, ang Facebook operator, mahimo gihapon nga maka-live selling ang mga Facebook users dinhi sa Pilipinas ginamit ang feature nga “Facebook Live” apan dili na ang “Live Shopping,” kay undangon na kini sugod karong Oktobre 1 ning tuiga.  Nabantayan tingale sa Meta nga gihimo na’ng merkado ang Facebook inay usa ka social network.  Dili mabasol ang mga “negosyante” nga mopasundayag sa ilang produkto sa Facebook. Kay ginaingon man nga, “Kon dili nimo ipasundayag ang imong baligya, sama ra nga nangidhat ka’g babaye taliwala sa kangitngit.  Ikaw lamang ug walay lain nakahibalo sa imong gibuhat.” Pagkatoytoy!

Ilegal ang pagbotar?

Miapil na ang mga batan-ong sakop sa NAMFREL sa panawagan nga ipadayon ang Barangay ug SK election karong Disyembre 5, 2022. Alang sa NAMFREL, ang pagpili og mga bag-ong lider mahinungdanon sa usa ka demokratikanhong nasud. Napanglantawan nga adunay sambog pamolitika ang pag-oktaba sa eleksyon. Hugot ang tinguha sa kongreso sa pag-oktaba sa eleksyon kay mipalabang na man sila’g balaodnon alang niini.  Kon dili molampos ang kongreso, kay naghiko-hiko pa man ang senado, basin magpasar sila’g balaod-on nga maghimong ilegal ang pagbotar. Madahaan!

Ipokritong panawagan?

Nanawagan sa DENR ang PAMALAKAYA, usa ka grupo sa mga mangingisda, nga hingpit nga sirad-an ang kontobresyal nga dolomite beach sa Manila human nga gibasol sa MMDA ang mga pumping stations niini nga maoy hinungdan sa pagbaha sa ubang bahin sa Metro Manila. Mora’g nangalisngaw sa ka-ipokrito ang maong panawagan. Mahinumduman nga wala pa ang dolomite beach, daan na nga magbaha ang daghang bahin sa Metro Manila. Haum ang panahom nga “Dili angay sunogon ang balay aron lang mapatay ang usa lamang ka ilaga.”