EDITORYAL - Political will ang solusyon

Political will. Mao kini ang gikinahanglan aron mapatuman sa bisan kinsang local chief executives ang ilang mga programa nga makaayo sa ilang mga konstituwente.

Mao kini ang gipakita karon ni Cebu City Mayor Michael Rama aning higpit nga pagpabawi gyud sa siyudad sa 3-meter easement sa mga kasapaan sa siyudad partikular diha sa Kinalumsan River.

Kaning pagpanghinlo sa mga kasapaan sa dakbayan importante kaayo tungod kay para kini sa kaayohan sa kinabag-an ug dili para lang sa pipila nga nagtukod og mga panimalay diha sa kilid sa sapa.

Ang pagtukod aning mga estraktura diha sa mga sapa peligroso para sa mga nanagiya niini. Kaning mga balay ug barung-barong, matawag man tuod nga pinuy-anan sa mga pamilya apan dili luwas para sa tanang miyembro niini.

Peligro kaayo kini panahon sa tinguwan tungod kay walay makatagna kun kanus-a mosuyla og dako ang tubig gikan sa kabukiran.

Gani sa bag-ohay lang nga pagbunok sa uwan pipila ka adlaw na ang nakalabay duna gyuy panimalay nga giibot gikan sa gitarukan niini ug gianod paubos, dala hasta ang magtiayong nagpuyo. Swerte nalang nga pareho silang naluwas.

Gawas pa, swerte lang gyud nga walay mga batang gagmay sa balay adtong tungora, kun duna pa, walay siguro kun dunay dautang nahitabo kanila.

Apan pila man kaha ka pamilya nga dunay mga anak ang nagpuyo sa mga balay nga gipangtukod diha sa sud sa tulo ka metros gikan sa tampi sa sapa karon? Paabuton pa ba diay nga dunay dautang mahitabo kanila?

Husto ang gihimo sa siyudad karon nga paghawan niini, gawas nga para kini sa ilang kaluwasan, usa sab kini sa solusyon aron mamenusan ang pagsaka og maayo sa tubig ug molapaw sa mga kadalanan ngadto na sa mga kabalayan.

Usa man gud kining mga estrakturang naa kilid sa mga sapa ang nakabara sa mga gapnod ug mga basurang gipatara lang og labay sa mga residente.

Gawas aning paghawan, kinahanglang seryusohon na sa mga barangay ang pagpatrolya sa mga sapa niini aron dili na tukoran og balik.

Ikaduha, kinahanglan duna gyud silay umolon nga grupo nga motutok sa pagdili sa mga tawo maglabog og basura sa mga sapa.