Giguba kay naluoy

Nindot ang gihimo sa kadagkoan sa Cebu City government nga ila na nga gipangguba ang kabalayan nga gitukod sa tampi sa Kinalumsan River dapit sa Barangay Mambaling.

Ang tinuod, maluoy gyud unta kita sa maong mga pamilya nga napugos gani pagpuyo diha sa maong dapit tungod kay wa man sila’y laing kaugbokan sa ilang panimalay.

Apan maisip ra usab nga kalooy ngadto sa maong mga pamilya ang gihimo sa mga opisyal sa Cebu City government kay kon tugotan sila pagpadayon pagpuyo sa maong dapit, mameligro sila nga mabanlas kon dunay kusog nga baha.

Nahinumdom mo sa nahitabo niadtong mikusog ang baha sa miaging semana, nga nabanlas ang usa ka barung-barong nga gitukod daplin sa Kinalumsan River ug maayo na lang kay ang nagpuyo niini naluwas ug wa mamatay.

Ang tinuod, dugay na kaayo nga ang mga nagpuyo sa tampi sa Kinalumsan River gihangyo nga mopahawa sa maong dapit, apan wa gyud sila mamati.

Tungod sa nahitabo niadtong miaging semana, napugos na gyud ang mga opisyal sa Cebu City government nga panggub-on na ang maong kabalayan sa tampi sa sapa.

Kon dili panggub-on, kuyaw kaayo nga ang mga nagpuyo sa kabalayan mangamatay kon mabanlas kini sa baha. Bisan kinsa pa ang magtan-aw, danger zone ang maong dapit kay kanunay kini nga masanapan sa tubig-baha.

Sayonan ka nga matud sa mga nagpuyo daplin sa Kinalumsan River nga mitug-an ni Konsehal Jerry Guardo nga miabot sa taga liog ang tubig nga misanap sa ilang barung-barong.

Ang usa ka metros nga luna daplin sa tampi sa sapa, maoy gitukoran og balay sa mga squatters. Ang ilang agianan duha na lang gyud ka dangaw dapit sa tampi. Pwerteng paita, ug angay na gyud silang ibalhin.

* * *

Mitan-aw ko sa movie nga Maid in Malacañang aron nga sutaon kon unsa ang dagan sa estorya, ilabi na nga gipakita nga ang character nga nagsul-ob ug yellow ug nag-eyeglasses sama ni kanhi presidente Cory Aquino, nagduwa og mahjong.

Abi ba nako og giwagtang na ang maong eksena tungod sa pagreklamo sa mga madre sa Carmelite Monastery, apan naa man diay gihapon.

Ang nahibudngan nako kay ang mga tawo nga nanan-aw sa salida, hilabihan ka hilom, wa gyuy bisan usa nga akong nadunggan nga midayeg kay nindot ang salida, ug wa sa’y miingon nga bati.

Ambot, kamo diha, unsay inyong pagsabot nganong hilom ra kaayo ang mga nanan-aw? Mokatawa lang panagsa kay ang usa sa mga “maid” kun katabang sa mga Marcos,  komedyante man kaayo.