Matuk-an sa ilang bakak

Gimando sa COMELEC sa tanang political parties sa pag-sumiter sa ilang Annual Sworn Information Update Statement (SIUS, nga adunay impormasyon kabahin sa ilang mga kasamtangang miyembro ug mga opisyales..  Ang kapakyas sa pagsumiter sa SIUS paga-isipon nga ebidensya nga nabungkag na ang maong partido.  Tataw nga gitumong niini kadtong mga “politkanhong kaba-kaba”.  Apan matud sa akong amigo, “Bisan kon wala pa kining kamanduan sa COMELEC, sagad sa mga poktikanhon partido, mahanaw ug mamatay ra sa kapulihay kay matuk-an ra man sila sa kaugalingon nila’ng mga bakak.  Madahaaan!

Pabutangan og “ulo”

Nagkadaghan ang nikondenar sa kontrobersyal nga pelikula’ng “Maid in Malacañang tungod sa usa ka eksena niini nga nagpakita sa kanhi Presidente Cory Aquino nga nakigduwa og mahjong sa mga madre kay usa kini ka malisyosong atake sa integridad sa mga madre.  Ang mga pagkondenar nakapakuryoso sa uban sa pagtan-aw sa maong lilas.  Makapahinumdum sa inahan nga mipasidaan sa iyang anak kinsa molangyaw ngadto sa dakbayan.  Matud pa sa inahan, “Dong, ayaw baya jud pag-apil-apil kon naay magduwa og piyat-piyat didto ha, kay mailad ‘nya ka.  Apan kon maka-full house gani ka, butangi jud og “ulo” ang bahig sa imong baraha, ha”.  Pagkatotoy

“Makapa-aslom” sa sabaw

Segun sa balita, mimando ang DENR-7 sa Bohol PENRO pag-imbestigar sa giingon’g naghingapin nga kamahal sa gibaligya’ng pagkaon didto sa Virgin Island sa Panglao, Bohol.  Miapil ang DENR sa isyu kay kuno ang Virgin Island nasakop sa Integrated Protected System diin ang ahensya adunay jurisdiction.  Lahi man tingale ang isyu sa pagpanalipod sa kalikupan ug sa isyu kabahin sa mahal nga presyo kinsa ang lokal nga kagamhanan ug ang DTI maoy angayan mosalida.  Kon nagtoo ang DENR nga mas maantigo sila mosulbad ni’ng maong suliran, maayo usab tingale nga apilon nila pag-imbetigar ang kamahal sa gasolina.  Haum ang panulitihon nga, “Daghang kusinero makapa-aslom sa sabaw”.  Feteleern!

Hanas molipat-lipat

Adunay balaodnon nga gisang-at sa kongreso nga buot maghiklling sa mandatory retirement age nga 65 anyos ug magtugot sa padayon’g pagtrabaho sa mga edaran kon mo-qualify sila sa mga kwalipikasyon sa trabaho.  Daghan edaran ang maka-uyon niining balaora.  Ginaingon baya nga “Lupigon ang baskog ug batan-on sa tigulang apan hanas molipatlipat”. Busa angayan patrabahoon pa ang mga hamtong basta dili pa siya magpunay’g pangita sa iyang anteyohos nga nasab-it ra diay sa iyang agtang.   Pagkatoytoy!

Libre ang hangin

Gitun-an karon sa Philippines Statistics Authority ang gitawag nga konsepto sa “shrinkflation”, nga mao ang praktis sa mga negosyante pagmenos sa gidak-on ug kalidad sa produkto aron lamang mapabilin ang presyo niini.  Sagad sa mga produkto karon, labi na ang tinapay, gipagamyan o ba kaha gipatubo pag-ayo, tungod sa kamahal sa mga sangkap niini.  Matud pa sa akong amigo, “Napamatud-an niya nga libre pa ang hangin kay mohiyos man dayon ang pan de sal bisan sa unang ingkib pa lang”.  Saoonz!.