EDITORYAL-Hilas ra kaayo ang China

Pagkahilas sa China nga mandoan ang Pilipinas pagsunod ug pagtahod sa One China Policy. Nakalimot tingali ang China nga ang Pilipinas usa ka gawasnong nasud ug dili niini probinsya.

O basin ingon niana gyud ang ilang tan-aw sa Pilipinas sukad nga nakigsuod kanila ang kanhi administrasyong Duterte nga nagsige ra og yangu-yango sa kung unsa ilang gustong buhaton dinhi ug sa South China Sea diin nahimutang ang West Philippine Sea. Ang Chinese embassy pinaagi sa ilang ambassador mipatawag sa kadagkoan sa Pilipinas aron pahinumdoman kini sa polisiyang gitamod sa nasud nga One China Policy. Gihimo kini sa maong opisyal human sa tension diha sa Taiwan Strait tungod sa pagduaw ni US House Speaker Nancy Pelosi sa Taiwan.

Labing una kining dunay taas nga lider sa US nga niduaw sa maong nasud sud sa nakalabay nga 25 ka tuig. Gikonsiderar kini sa China nga pagpanghilabot sa Amerika sa soberiniya niini tungod kay giisip lamang nilang probinsya ang Taiwan ug ilaha kining bawion gikan sa lehitimong gobiyerno niini sa bisan unsang paagi, malinawon man o pinaagi sa giyera.

Ang maong polisiya tinuod gisagop sa kadaghanan sa mga nasud sa kalibotan, lakip niini ang Pilipinas ug bisan ang Amerika.

Ang gipasabot niini, nga ang mga kanasuran miila nga usa ra ang nasud sa China. Apan wala kini nagkahulogan nga giila sa kalibotan ang pangangkon sa China sa Taiwan nga iyaha lang probinsya. Ang Taiwanese wala magtan-aw sa ilang kaugalingon nga Chinese kondili mga Taiwanese sila.

Ang Pilipinas adunay kaugalingong soberiniya ug makabuot kini kun unsa nga foreign policy ang sagupon ug wala niini kinahanglana ang opinyon sa ubang mga nasud kun unsaon kini paghimo, samot na kun gikan kini sa China nga nangilog sa teritoryo niini.

Nasobrahan na kining mga opisyales sa China nga magpatahod. Mas maayo tingaling sumbalikan og pahinumdom sa gobiyerno sa Pilipinas kining maong Chinese ambassador kung asa kini molugar.

Nga dili niya mahimong mandoan ang Pilipinas kun unsay buhaton niini sa kaugalingon niining nasud.