Kun unsa ka taas ang imong lupad mao usab ang imong lugapak

Usahay ang tawo kun mao na gani ang makasukad og angat nahikalimot kun diin siya gikan. Naghinobra ang kamapahitas-on labina kun maligo na sa mga walay hinungdang pasidungog ug natural ang salapi nga kun dili maayo pagkadala maoy sinugdanan sa kinaugalingong kahakog. Dili na makita ang ubang tawo. nakita lamang ang ilang kaugalingon. Kining maong matang sa panlantaw nakapaaghat sa hingtungdan nga bisan kun dili  na makaayo sa ilang isig ka ingon padayon gihapon silang nihimo sa pagdaut sa ubang mga tawo.

Dunay uban nga nihimo niini sa ngalan sa arte? Ug gani moingon nga ang ilang gihimo usa lamang ka dakong fiction. Apan kun ang fiction dunay sukaranan sa kasaysayan ug sa mga tinuod nga mga hitabo. Ang over confidence sa kaugalingong katakus maoy nagmudmod sa nawong sa usa ka banyaga nga mas maayo pa nga duolon ang demonyo kaysa pag-angkon sa iyang masalaypong mga lakang. Ang entitlement ning maong pamilya nga buot paminawon sa kadaghanan bisan tataw na kaayo nga nahimong loyal ang mga alepores tungod sa mga benepisyo ug kun ugaling mahanaw ang benepisyo ambot lang kun magpabilin pa ba gihapong loyal ning mga tawhana.

Dili lang kini mahitungod kun kinsay husto o kinsay dili. Mahitungod kini sa katilingbanong kaakuhan nga momantala sa mga maayong mga butang kaysa mga dautan. Nahimong lisud kab-oton o puy-an ang integridad ning panahon sa moral nga kalamidad. Unta ang demonyo nga gikahinaman kun makadungog man siya ang mosulod kaniya nga naghandum kaniya. Tingali anang mga panahona, mamahimong mahinungdanon alang kaniya ang Dios.