Mahal ang Birhen nga Isla

Nag-viral sa social media ang reklamo sa mga lokal nga turista nga mibisita sa Virgin Island sa lungsod sa Panglao sa lalawigan sa Bohol.

Gireklamo sa mga turista ang ka dako sa ilang gibayran sa ilang gikaon sa isla nga misumada sa kinatibok-an og P26,100.

Sa sumada nga gisuwat lang sa papel, ang saging (P900), ang lato (P800), ang Urchin (P2,500), baby squid (P1,500), squid (P2,500), oyster (P3,000), scallops (P3,000), isda sugba (P2,800), isda kinilaw (P3,000), isda tinola (P1,800), dili nako mabasa (P2,500), (P1,200), (P1,000).

In fairness, sa mga namaligya ang gipakita mao lang ang kinatibok-ang sumada. Wala gibutang pila ka kilo ug unsa nga matang sa usda ang ilang gipaluto, pila ka buok ang saging, pila ka kilo ang lato, oysters, urchins, scallops ug tagpila ang kilo niini. Aduna pud mga butang nga iapil sa pagkonsiderar sa dili pa kita moderitso sa paglayat sa atong konklusyon nga mahal ang ilang gikaon. Ikonsiderar pud ang kadaghanon sa mga nangaon. Dili man pod seguro usa lang ka kilo ang gi-order sa mga nagreklamong turista tungod kay og wala ko masayop 11 man sila ka book nga nangaon.

Tungod ning maong hitabo, gisuspenso na ni Bohol Governor Aris Aumentado ang biyahi sa mga sakyanan sa dagat paingon sa Virgin Island. Temporary na pud nga gipahunong sa mayor sa Panglao ang pagpamaligya og pagkaon sa isla. Ang gipabilin sa mayor sa isla mao na lamang ang sight seeing.

Ang departamento sa turismo seryoso usab nga mimando og imbestigasyon sa reklamo, gani ang DENR kon wa ko masayop moapil na usab sa imbestigasyon.

Dili ikalimod nga duna gyuy mga tourist destination nga mopahimulos sa mga bisita nga turista hinungdan nga maayo nga tinud-on ug seryosohon ang imbestigasyon.

Ang imbestigasyon makahatag usab og kahigayonan sa pagpasabot sa ilang habig aron maklaro og makiangayon o dili ba ang prisyo sa ilang mga baligya.

Sugyot pod nako sa mga mamaligyaay nga butangan og presyo ang ilang baligya aron dili masurprisa ang mamalitay sa ilang baligya.