Unang SONA may nakulang

Nindot ang unang State of the Nation Address (SONA) ni Presidente Bongbong Marcos (PBBM). Kay nagpunting sa mga dagkong kaakohan nga kinahanglang buhaton gayod alang sa kabulahanan sa tanan.

National security, pagpalambo sa agrikultura, pagpabangon sa ekonomiya, pagpakigbugno sa COVID-19 pandemic nga dili na mag-lockdown ug daghan pa ang iyang gipahimug-atan sa pagladlad sulod sa iyang usa ka oras ug 15 minutos nga SONA.

Apan ang tag-iya ug chairman sa SMNI Pastor Apollo C. Quibuloy, kinsa diehard supporter ni kanhi Presidente Rodrigo Roa Duterte (PRRD) ug saludo kaayo sa tanang nabuhat niini, midayeg man tuod sa unang SONA ni PBBM, pero mipadayag sa iyang kahisagmuyo.

Kay wala kuno malakip paghisgot ang bahin sa war on drugs, paglutos sa teroristang grupo: Communist Party of the Philipines (CPP), New People’s Army (NPA) ug National Democratic Front (NDF).

Nakomparar sa pastor ang ka bukal ni Tatay Digong sa paglutos sa illegal drugs syndicates ug sa mga komunistang rebelde, diin halos sa matag SONA ni PRRD pabuthon gyod kini gikan sa iyang baba. Samtang sa unang SONA ni PBBM wala na kini mahisgoti.

Sanglit, bisan pa panahon sa kampanya ug hangtod nga siya midaog, subling gianunsiyo ni PBBM nga pahaiton pa niya ang puwersa paggukod-puo sa illegal drugs, corruption ug hingpit nga pagpayhag sa komunistang grupo sa linain niyang mga paagi, diin walay masulti ni masaway ang taga Human Rights. Ug kinahanglan pa ba kining ibandilyo sa iyang SONA?

Himatikdan baya, nga halos kada adlaw adunay drug personalities ang mangadakpan sa kapolisan gumikan sa walay hunong nilang buy-bust operations sa nagkalainlaing dapit sa Pilipinas. Timaan, nga wala man tuod kini maapil sa SONA ni PBBM. Pero, hilom nga gitrabaho.

Wala pay 100 ka adlaw ang pagdala sa renda sa Malakanyang ni PBBM. Dili kita angay nga magdalidali ug moagrabyar unsay nakulang sa iyang SONA.  Ang importante, nga seryoso niyang gipakita ang pagtuman sa unsay iyang gisaad?

Niini lang bag-o, human gub-a sa 7.0-magnitude nga linog ang kabalayan sa Abra, giadto gilayon kini ni PBBM. Iyang giingnan ang mihugop nga tanang biktima: “Sa miaging piniliay, inyo kong gitabangan. Karon, ako na poy motabang ninyo!”

Mitulo akong luha, uy!