Wala makalimti ni PBBM ang Sugbo

Nakaani og nagkadaiyang reaksyon ang kinaunahan nga State of the Nation Address ni Presidente Ferdinand Bongbong Marcos Jr. niadtong Lunes diin milanat og usa ka oras ug 14 minutos. Taas man apan para nako undanon ug daghan og mapupo sa iyang gipamatbat sa iyang SONA.

Wala mataligam-an ang ubang mga dapit sa nasud, siyempre apil ang Sugbo sa na-mention sa presidente diin ipatuman ang programang imprastraktura ilabi na sa natad sa transportasyon sama sa railway system ug ang Bus Rapid Transit o BRT. At last mahatagan na gyud og katumanan kining proyektoha kay usa man ni sa gisaad sa presidente.

Gihangop sa mga local government officials ang naasoy’ng kalamboan diin usa sa nahimuot siyempre ang gubernador sa sugbo Gwen Garcia, Cebu City Mayor Mike Rama kinsa pulos midayeg sa SONA sa presidente.

Sa written statement ni Garcia gihulagway niya nga “very comprehensive, short on motherhood statements and long on concrete plans...most importantly, for Cebu, we are topmost in his mind in terms of infrastructurem the President’s plans are in synch with Cebu’s direction.”

Labaw sa tanan nga gidayeg sa atong local chief executive ang gipadayag sa pangulo nga “no more lockdown.” Nindot gyud kaayo paminawon nga nakaani gani og pagpalakpak mismo sa mga nananmbong sa SONA.

At least dili na ta kulbaan nga basin mabalik ang mga dautang kasinatian kaniadto nga gipang lockdown ang mga dapit tungod sa pagsaka sa kaso sa Covid-19, karon balik na ta sa naandan nga kasikas sa atong kinabuhi basta himoon usab nato ang atong shared responsibility pagtuman sa mga basic health protocols.

Daghan pa kaayo ang gipanaad sa presidente, bisan og dili dayon matuman sulod lang sa usa ka adlaw apan malipay nalang pud kita nga naa kitay hulaton inig abot sa panahon.

Tanang panginahanglanon sa natad sa food production diin nakadepende usab sa pagpalambo sa agrikultura nga maoy iyang gihuptan karon isip secretaty sa department of Agriculture. Sa natad sa panglawas, gipatutukoan usab niya nga mapaduol pa sa katawhan ang serbisyo sa gobiyerno nga dad-on mismo ngadto sa kabalayan sa mga tawo.

Sa natad sa edukasyon, gipatun-an pa niya ang K-12, apan segurado na nga ibalik sa pagpatuman ang reserve Officer Taining Course or ROTC ug ang pagbalik na sa in person classes alang sa kaayohan sa pagtuon sa mga bata.

Lig-on usab ang baruganan ni PBBM sa isyu sa atong teritoryo nga nakapasamot og pagdayeg sa mga tawo, maayo unta kon dili lang kutob sa pulong kon dili ipakita kini sa buhat.

Gipasalig usab niya nga ipadayon ang mga programa sa iyang nasundan nga administrasyon lakip na ang build build build program nga gikinahanglan alang sa gitinguha nga kalamboan. Pipila lang kini sa gipamatbat ni PBBM nga atong atangan nga mahatagan og katumanan sulod sa unom ka tuig niya nga pagdumala sa nasud. Siguro adunay mga dili motoo kay gusto lang nila nga dili motoo, apan mas daghan man seguro nga mga tawo ang misalig nga matuman ang gipamulong sa atong bag-ong pangulo.

Overall para nako makatagbaw ra ang SONA sa presidente, hinuon wala niya mahisgoti ang isyu sa peace and order apil na ang isyu gani sa illegal nga drugas apan kong molampos ang mga programa nga nagtutok sa ekonomikanhong kalamboan sa nasod, mosunod usab niini ang kahapsay ug kalinaw, kong ang mga tawo aduna nay igong pagkaon posibleng dili na makahunahuna og himo sa krimen.

Wala man mahisgoti kaayo ang peace and order apan wala kini magpasabot nga dili kini prioridad, gisuhid lang og una ang mga isyu nga makaapekto sa kahapsay ug kalinaw sa atong nasud.