Gi-indyan ang patay

Usa ka 59-anyos nga babaye ang namatay sa komplikasyon sa diabetes didto sa sitio Isla Verde Barangay Inayawan, syudad sa Sugbo ang wala mahatagi og pagrespeto atol unta sa adlaw nga siya sa kataposang pahuwayan, ang nagyamayama kaniya mismo ang punerarya nga gikuha nga moserbisyo kaniya.

Hulyo 3 gikatakda nga ilubong ang babaye apan namuti nalang ang mata sa mga tagtungod wala gyud moabot ang mga crew sa punerarya nga ilang gikasabot. Busa gisigehan nila og kontak, apan dili na manubag sa tawag ang staff ug mismo kuno ang nagpailang tag-iya.

Matud sa pag-umangkon sa namatay nga aduna silay balanse nga P10,000 ug daan na niingon ang punerarya nga dili tiwason ang serbisyo kong dili mabayran ang ilang obligasyon.

Tungod kay kabus man ang namatay ug ang pag-umangkon ra niya ang nag-asikaso nagtampotampo usab ang mga silingan aron makatigom alang sa pambayad sa punerarya apan gamay ra nga kantidad.

Gihangyo nila ang punerarya bisan og naa nay nigarantiya apan wala gyud kuno mosugot maong mihangyo nalang sila sa Barangay Inayawan nga mogamit og sakyanan nga makahatod sa lungon ngadto sa simbahan lahos sa sementeryo kay mabaho naman ang ilang minatay kong dili malubong niadtong adlawa.

Gisulayan nako og kuha ang habig sa punerarya apan wala gani estraktura nila sa dapit nga giingong naa didto ang opisina kay matud sa tabitabi sa mga marites nga akong naestorya didto, nag-subcon lang kuno ang punerarya nga mao pa lang pagsugod. Hinoon laing isyu na sad na. Makasabot man usab kita sa habig sa punerarya nga gikinahanglan gyud nila ang bayad ilabi na nga bag-o pa lang sila ug walay kaugalingong pasilidad maong ang ilang makolekta nga bayad mao usab ang gamiton sa pagbayad sa abangan nila nga mga kagamitan ug sa mga tawo nga ilang gisweldohan.

Apan ang dili pagtiwas sa serbisyo sa minatay usa ka pagyamayama sanglit usa man ka sagrado ang lawas sa tawo. Nisaad man ang pamilya nga mohatag sa balanse busa mahimo nilang paninglon inig ka human mahipos ang minatay.

Ang naasoy’ng panghitabo ang nakatukmod kang Konsehal Rey Gealon, pangulo sa Committee on Laws sa konseho nga moduso nga mohimo og resolution pagsilot sa mga punerarya nga dili motiwas sa ilang serbisyo sa minatay.

Karong adlawa gikatakdang ipatawag sa Konseho ang tanang funeral services aron makuhaan og inputs sa pandayon nga ordinansa o bisan unsa nga lakang pagseguro nga dili madihado ang minatay.

Matud sa pamilya nga lisod kong ang pobre mamatay kay dili gyud maserbisyohan, patay na gani samotan pa sa pagpatay. Unta ipatigbabaw ang pagkatawo sa panahon sa pagpanginahanglan sa uban kay sa ipatigbabaw ang kahakog sa kwarta.