Asa kutob ang pahumot?
Masukod asa kutob ang pahumot sa administrasyon ni President-elect Ferdinand Marcos Jr. pila ka adlaw human siya mobanos sa Malakanyang sa udtong tutok karong Hunyo 30 kon:
Paninglan na sa iyang gitudlo nga pangu sa Bureau of Internal Revenue (BIR) sa P203.8 bilyones nga utang sa estate tax sa ilang pamilya nga wa nila bayri sa niaging 33 na ka tuig; ug
Tugotan sa International Criminal Court (ICC) ang pormal nga imbestigasyon sa mga pasangil sa crimes against humanity batok nilang outgoing President Rodrigo Duterte ug iyang mga sinugo.
* * *
Pahumot sa lokal ug langyaw nga mga negosyante ang iyang pagtudlo ni Gobernador Benjamin Diokno sa Bangko Sentral ng Pilipinas (BSP) isip incoming finance secretary. Klarong si Diokno maoy nirekomendar sa mga sakop sa iyang pangulohan nga economic cluster sa gabinete.
Apil nang incoming BIR Commissioner Lilia Guillermo. Nga kon motuman sa saad pagpaningil sa utang sa mga Marcos makapahimutang sa kiwaw nga sitwasyon sa administrasyon. Mopaundayon ba si Marcos Jr. pero mangita og laing lusot? O mohukom nga human nang pahumot ug taktakon si Guillermo tungod sa kamapangahason?
* * *
Pahumot sa ubang kanasuran ang iyang pasalig nga motambong sa mga tigom sa United Nations (UN) ug Association of of Southeast Asian Nations (ASEAN) ug pagyangu-yango sa awhag sa mga embahador sa Uropa sa pagtahud sa balaod ug tawhanong katungod.
Padayunon bang pahumot kon, isip kabahin sa pagpadayon sa pormal nga imbestigasyon sa extrajudicial killings sa Davao sa wa pay 2016 ug sa tibuok nasud human sa 2016, ipadakop sa ICC silang Duterte ug kaubanan?
* * *
O mohukom nga human nang pahumot ug duphan ang iyang alyado? Nga, bisan nipasangil niya nga adik sa cocaine, tapolan ug huyang nga lider, amahan sa katunga sa puwersa nga nipabalik niya sa Malakanyang? Lahi sa mga negosyante, di niya kaulug-ulogan ang ICC.
Kinahanglan siya nga mopili: Mogakos ba sa kalibotanong mga institusyon sa pagpatigbabaw sa katarung ug kaangayan? O mosunod ni Duterte sa paggakos nilang Chinese President Xi Jinping ug Russian President Vladimir Putin ug sa pagbalikas sa uban–sama sa mga pangu sa Estados Unidos ug European Union ug bisan ni Pope Francis?
* * *
- Latest
