NSA Carlos hait

Halandumon kadtong duha ka presidential debate-interview nga gipahigayon sa Sunshine Media Network Internationa (SMNI) panahon sa kampanya sa milabay’ng eleksiyon. Diin, usa sa mga piniling dekalibreng panelista, ang kanhi tinamod propesora sa University of the Philippines, Diliman, Quezon City nga si Filipino political scientist Clarita Reyes Carlos, kinsa nakatudlo og 56 ka tuig sa nahisgotang unibersidad human meritiro niadtong Hunyo, 2011.

Dili lang graduwado sa Master’s degree in Political Science si Clarita. Kondili, doktor usab sa Political Science. Unya, nakapaambit sa iyang nahuptang kaalam bahin sa political psychology didto sa Cornell University ug sa iyang mga foreign policy analysis didto sa California, Los Angeles isip Fulbright Visiting Fellow.

Rason, nganong nangahadlok ang upat ka presidential candidates: Leni Robredo, Manny Pacquio, Panfilo Lacson ug Isko Moreno pag-apil sa maong debate’ng gitanyag sa SMNI. Bisag unsa na lamay gihimong alibi.

Pero si Bongbong Marcos (BBM)? Misanong dayon! Nakigharong sa kalisod sa mga pangutana bahin sa foreign policy nga gibuhos-paulan ni Clarita panahon sa maong presidential debate, nga sayon rang gitubag ni BBM. Diin, nakapahanga ni Clarita ug sa milyong viewer nga nakasaksi.

Misamot ka inilog si BBM sa presidential race. Midaog pinaagi sa super majority votes. Ug kay kinahanglan mang mag-appoint siya og mga hinashasang lider alang sa iyang gabinete, kadali ra siyang nahinumdom ni Clarita.

Iya kining gitanyagan og puwesto pagka secretary sa Department of Foreign Affairs. Hinuon, wala dayon modawat ang propesora.  Pero dihang nag-one on one talk sila ni President-elect BBM (PBBM), diin sa naghinapos nga bahin sa ilang panag-istorya, gihangyo siya kon puwede bang himoong National Security Adviser (NSA) niini, mitando gilayon si Clarita.

Tukmang opisyal ang gipili ni PBBM. Gani, sa interviews, diin gipangutana si Clarita kon pabor ba siya sa peace talk isip solusiyon sa insurhensiyang mugna sa Communist Party of the Philippines-New People Army-National Democratic Front? Ang iyang tubag: “No!”

Apan, matud niya, imbes makig-peace talk ni Joma Sison, kinsa maoy gamot niining maong suliran, ang atong gobiyerno maoy moduol sa tanang rebeldeng nagtagotago aron kombinsihong mobalik na sa patag ug makighiusa sa nagmahal nilang kagamhanan ug katawhan.

Simple ra tuod kining diskarte ni NSA Clarita Carlos. Pero, hait!