Pagsabotahe sa BIR
Klaro na. Sukwahi sa gilaoman sa mga magbubuhis nga ligdong nga nanginabuhi ug matinud-anon nga nibayad sa ilang obligasyon sa gobiyerno, way plano ang mosunod nga liderato sa Bureau of Internal Revenue (BIR) sa pagpaningil sa dakong utang sa buhis sa Pamilyang Marcos.
Wa direktang modeklarar si incoming BIR Commissioner Lilia Guillermo nga kalimtan ang P203.8 bilyones nga utang sa estate tax sa mga Marcos. Mas grabe ang iyang gihimo: Nagpa-gorya-gorya sa kontrobersiya; ug nipatigbabaw sa sayop nga pangangkon nga wa pa mahuman ug mahimo pang aregluhon ang kaso.
* * *
Una, ang pagpakaaron-ingnon. Niangkon si Guillermo nga wa siya kahibawo sa mga detalye sa utang sa mga Marcos. Way nituo niya. Ang nagpuyo ra sa langob sa labing suok nga lugot ra ang wa kadungog sa kaliboan ug usa ka detalye giunsa pag-isnab sa mga Marcos ang ilang utang sa niaging 33 ka tuig.
Si Guillermo ra sab ang nisukwahi sa iyang kaugalingon. Dihang nisumbong sa iyang labaw, incoming Finance Secretary Benjamin Diokno, nga mahimong di niya makaya ang isyu, nabantang ang iyang kasuhito sa kalang-og sa kinatibuk-ang eskandalo.
* * *
Dayon, ang pagpailad. Ang pagdason ni Guillermo sa pasalig ni Diokno nga wa nay labot ang BIR sa isyu kay nasang-at na sa korte maoy timaan nga magpagamit siya sa pagpatigbabaw sa higanteng bakak.
Kay igo ra siyang nikopya sa linya ni President-elect Ferdinand Marcos Jr. sa niaging kampanya. Nga bakak ang pangangkon sa iyang mga kaatbang. Kay wa pa mahibaw-i utangan ba ang ilang pamilya. Gani, sabutsabotan pa nila sa BIR pila ang bayranan.
* * *
Si Guillermo gipasidunggan nga usa sa labing gamhanang babaye sa information technology. Pero nipili siya sa pagpuyo sa karaang langob sa sayop nga kasayuran. Bahala nang kaayuhan sa nasud, gipalabi niyang hakog nga interes sa nagtudlo niya sa puwesto.
Nipasalig si Guillermo sa pagpalambo sa koleksiyon sa buhis pinaagi sa digitalization sa sistema sa BIR. Angay siyang pahinumdoman nga ang bisan unsang teknolohiya magmalampuson lang kon saligan ug gamiton sa mga magbubuhis. Ambot unsaon niya pagkuha ang pagsalig sa katawhan kon ang sukaranan sa iyang liderato mao ang pagtila sa nangalisbo nga lapalapa sa mga nisabotahe sa iyang mandato.
* * *
- Latest
