Mga drayber sa pampublikong sakyanan wala na kaagwanta

Nagpadayon ang atong pagpas-an sa kabug-at sa epekto sa walay hunong nga umento sa presyo sa lana diin halos moabot na sa P100 nga level pero murag dili kuno moabot ani kay kutob ra daw sa 99 or line of 9 ang oil pump calibration sa mga gasolinahan. Nisulay ko og adto sa buhatan sa Department of Energy-7 kagahapong adlawa aron mangayo og pagpasabot mahitungod niini kay sila man gyud ang dunay otoridad nga mopasabot sa ingon niini nga isyu kay basin maghisgot hisgot ko ani dili diay mao.

Apan walay miatubang nga opisyal kanamo kay busy kuno sila tungod kay naay mga opisyal gikan sa kaulohan ang nangabot. Busa wala gyud miy nadadaw didto, daghan pa ra ba unta ko mga katin-awan nga kuhaon gikan nila.

Basin karong adlawa o sa umaabot pa nga mga adlaw available na sila.In fairness sa ilang regional director moatubang man gyud hinuon na kong wala lay laing gikabisehan.

Dili lang ang sektor sa public transportation ang mitiyabaw sa ka taas sa presyo sa lana kon dili tanan nga adunay mga sakyanan. Kay ang uban gani for family use only nalang ang mga sakyanan kay kasagaran nag commute o kaha nag besikleta aron makadaginot sa fuel.

Ako gani kong dili pa lang laayo sa trabahoan ang among balay kaayo nalang gyud ibaklay magpatidpatid sa lata hangtod moabot sa padulngan maka exercise pa. Dili sad ko mag-bike bisan kahibalo ko mo-bike kay murag naglatay sa lugas lanot ang kinabuhi simbako mataymingan og tampalasan nga motorista patay kang bata ka.

Matud ni Greg Perez, ang pangulo sa PISTON nga maoy hugpong sa mga PUJ driver sa Sugbo, nga 5% sa ilang mga miyembro ang nihunong na sa pagpamasahero kay alkansi na kaayo, nangita og laing trabaho o ang uban nagtikad og yuta sa probinsya. Mao diay nga daghang mga pasahero sa daplin sa karsada nga gabarog ug naghulat og masakyan kay ang mga driver namahulay na diay.

Sa pagkakaron kutob ra gyud sa damgo ang tinguha nga moubos pa ang presyo sa produktong petrolyo nga inig mata dili diay tinuod. Sige mo-adjust nalang ta sa mga pamaagi nga atong himoon aron dili kaayo sakit. Ang pamaagi mao ang pag-anad sa atong kaugalingon nga pait na gyud ang sitwasyon karon. Pero dili man sad mahimo nga mo-surrender nalang kay gikinahanglan natong mopadayon. Nakalabang gani kita sa kapin duha ka tuig nga pandemic, kayahon usab nato kining krisis karon.