EDITORYAL - Balik na sa eskuylahan

Gikinahanglan nang mobalik sa linawas nga pagtambong sa klase ang mga tinun-an. Karon nga kadaghanan sa mga kabataan nabakunahan na ug hinayhinay ng naanad ang mga Pilipino nga mabuhing kauban ang pandemiya sa Covid-19.

Daghan na ang nanawagan nga angayan ng mobalik sa face to face classes ang mga tinun-an. Apan ang DepEd dili buot nga dali-dalion ang paghimo niini tungod sa pasidaan sa kadagkoan sa Department of Health bahin sa peligro.

Hinuon dunay punto ang DOH bahin niini, apan mahulog sab nga walay kapuslanan ang mga bakunang gigastohan og bilyones pesos sa gobiyerno kun magpabilin ang mga estudyante sa kasamtangang sitwasyon karon.

Duha ka tuig nga walay face to face classes, bag-ohay palang gipatuman ang limited face to face classes sa mga piniling mga tunghaan apan dili tanan gitugotan nga makaapil niini.

Nakasabot ang mga ginikanan sa hulga sa Covid-19, apan isip ahensiya sa gobiyerno nga nagtan-aw sa kaayohan sa mga kabataang Pilipino apil gyud unta sila sa manguna sa pagawhag sa tanan nga tun-an ang kinabuhi nga naa ang Covid-19 sa palibot.

Ang umaabot nga kalihim sa DepEd nga si Vice President-elect Sara Duterte miingon nga gusto niyang makabalik na tanang tinun-an sa mga eskuylahan karong bulan sa Agosto.

Tinuod gyud nga ang duha ka tuig nga wala pagtungha sa mga kabataan diha sa ilang mga tunghaan nakaapektar sa kalidad sa ilang nakat-onan sa mga leksyong gihatag pinaagi sa modules o online classes.

Dili tanang mga tinun-an ang parehas og kalibre sa pangutok ug sa kapaspas pagkat-on sa mga leksyon.

Luoy kaayo ang mga tinun-ang dili kaayo maatiman sa mga ginikanan nga giuna ang ilang panginabuhian tungod sa ilang kabutang.