Pamakak hangtod sa kinatumyan
Sama sa ilang gihimo sa niaging kapin sa duha ka tuig na nga pandemya, ang administrasyon ni Presidente Rodrigo Duterte motapos sa ilang termino pinaagi sa pagpataka. Imbes angkunon ang kapakyas sa pagpamakuna batok sa Covid-19, giusab nila ang target. Hangtod sa Hunyo 17 karong tuiga, nipahibawo ang Malakanyang nga 70 milyones na ang fully vaccinated. Imposible nang makabakuna og dugang 20 milyones sa nahibiling 13 ka adlaw aron matuman ang pasalig nga 90 milyones ang fully vaccinated karong Hunyo 30. Imbes mangayo og pasaylo sa kapakyasan, gipaubsan nila ang target aron makapapating nga nilampos ang pagpamakuna.
* * *
70% sa nasudnong populasyon ang orihinal nga target sa pagsugod sa pagpamakuna niadtong Marso 1, 2021 aron maangkon ang herd immunity batok sa Covid-19. Pero tungod sa pagtumaw sa Omicron ug mas mananakod nga subvariants gipasakaan sa Department of Health ang target ngadto sa 90% sa populasyon. Nikumpisal si vaccine czar Carlito Galvez nga tungod sa kaluya sa pamakuna sa tibuok nasud sa niaging mga buwan di na sila makabakuna sa 90 milyones ka Pilipinhon inig kanaog nila sa katungdanan dungan ni Presidente Duterte. Pero niinsistir gihapon og kadaogan pagkab-ot sa karaang target.
* * *
Ang tinuod mao nga hagbong ang administrasyon ni Presidente Duterte bisan sa orihinal nilang target nga pagbakuna sa 70% sa populasyon. Sa banabana sa Philippine Statistics Authority ug United Nations, niabot na og kapin sa 112 milyones ang populasyon sa Pilipinas karong tuiga. Sa ato pa, 62.5% ra sa nasudnong populasyon ang nabakunahan nga 70,005,247. Aron maabot ang orihinal nga target nga 70% ang mabakunahan, kinahanglan nga mamakuna silang Galvez og 8.4 milyones sa nahibiling kapin na lang sa semana. Nga, salamat sa ilang kalangayan ug katapolan, di na mahitabo.
* * *
Ang pait nga kamatuoran mao nga gipaburot sa administrasyon ang mga numero sa kinatibuk-ang pamakuna. Pananglitan, ang kinauwahiang numero ilang giangkon nga 77.78% na sa target population (di sa tibuok populasyon) aron mas daghan nga paminawon.
Hangtod sa kataposang mga adlaw sa administrasyon, nagpaugat sa bakak nilang mga numero. Mahimong nituo na sa ilang bakak. O, tungod ba kaha sa resulta sa eleksiyon, nakumbinser nga ilarunon ang katawhan.
* * *
- Latest
