Labaw sa pagdaginot
Pagmatuod nga siya ang SAP (Super Ate ng Pangulo), ang ngan nga iyang giangkon, nga nakapasamot sa pagduda nga ang nidaog sa niaging eleksiyon di maoy hawod sa mosunod nga unom ka tuig, si Senador Imee Marcos nideklarar nga duna na siyay sulbad sa kaapiki sa nasudnong panudlanan (daghang salamat sa kapin sa P13 trilyones nga utang nga ibilin ni Presidente Duterte human sa Hunyo 30):
Tangtangon gikan sa 2023 budget (nga giandam na sa administrasyong Duterte) ang vanity projects, sama sa mga biyahe, trainings, bag-ong buildings ug mga sakyanan.
* * *
Tungod sa kataas sa iyang kasinatian sa gobyerno, nga nagsugod pa sa iyang pagpangu sa Kabataang Barangay sa diktadura sa iyang amahan, nahibawo tingali si Senador Marcos sa iyang gipanulti. Binilyon ka pesos gyod tingali ang madaginot kon masuspenso ang di importante ug dinaliang mga proyekto.
Hinaut nga di maduhig ang trainings ug workshops nga gikinahanglan pag-andam sa mga trabahante sa gobyerno sa bag-o nilang mga gimbuhaton ug bag-ong mga teknolohiya. Hinaot nga di masakripisyo ang pagtukod sa dinaliang mga proyekto para sa edukasyon ug kahimsog.
* * *
Mangahas hinuon ko og sugyot: Samtang maayo ang pagsuspenso sa mga proyekto nga makapaabot sa mosunod nga katuigan, aron mauna ang paghatag og direktang tabang sa mga drayber sa mga sakyanang pamasahero ug ubang sektor nga labing naapiki sa pagsulbong sa presyo sa lana ug ubang palaliton, mas maayong motabang ang mga Marcos sa pagpalambo sa nasudnong panudlanan.
Masabot kaayo nganong wa iapil ni Senador Marcos sa iyang mga rekomendasyon ang pagbayad sa ilang utang sa estate tax nga, sa kinauwahiang demand letter sa Bureau of Internal Revenue, niabot og P203.8 bilyones.
* * *
Kon motakilid ang mga Marcos ug impasan ang utang nga natanggong sud na sa 33 ka tuig, matabangan ang tanang nagkalisudlisod nga mga sektor sa way pagsakripisyo sa dinaliang mga proyekto.
Magpasalamat ang katawhan kon gamiton ni Senador Marcos ang iyang pagka SAP aron pagkumbinser sa ilang pamilya nga ang bayad sa estate tax makatukod og gatosan ka eskuylahan (aron di maghuot ang mga bata inig balik sa face-to-face classes), o gatosan ka ospital (aron di moawas ang mga pasyente kon simbako mosulbong pagbalik ang mga kaso sa Covid-19).
* * *
- Latest
