Turncoatism ug dinastiya
Karong nagkapupos nang termino ni Presidente Rodrigo Duterte, makiangayon lang nga susihon natuman bang iyang mga saad sa pagpapili sa labing taas nga katungdanan sa nasud niadtong 2016. Gawas sa mas nabantog niyang pagsalig pagsulbad sa ilegal nga drugas (sa unang tulo ka buwan sa iyang administrasyon) ug pangurakot (sa unang tuig sa iyang pagbanos sa Malakanyang), niluwat sab siya og laing duha ka saad nga mas makahuloganon kapin sa buwan human sa eleksiyon sa Mayo 9:
• Pagtapos sa turncoatism sa 2018; ug
• Pagtapos sa politikanhong mga dinastiya sa 2018.
* * *
Gawas nga wa mabadlong ang turncoatism, ang presidente ug iyang mga alyado nag-ambak-ambak og mga partido dayong eleksiyon:
• Human ilogang liderato sa PDP-Laban gikan ni Senador Manny Pacquiao, si Presidente Duterte nidagan pagka senador ubos sa Pederalismo ng Dugong Dakilang Samahan (PDDS), dayong hukom pagpahuway sa politika;
• Iyang anak, Sara Duterte, nibiya sa Hugpong ng Pagbabago (HNP) ug nagpasakop sa Lakas-CMD dayong dagan pagka bise presidente; ug
• Iyang alyado, Ferdinand Marcos Jr., nitalikod sa Nacionalista Party (2009-2021) ug Kilusang Bagong Lipunan (1980-2009) ug nibalhin sa Partido Federal ng Pilipinas (PFP).
* * *
Human nihulga pagbungkag sa mga dinastiya, gipalig-on ni Presidente Duterte ang iyang kaugalingong dinastiya pinaagi sa tulo niya ka anak: Si Sara bise presidente; si Sebastian mayor sa Davao City; ug si Paolo kongresista sa Davao City.
Nilambo sang mga dinastiya sa iyang mga alyado: Mga Marcos; mga Arroyo; mga Estrada; mga Villar; mga Cayetano; mga Zubiri; mga Gatchalian; mga Revilla; mga Tulfo; mga Remulla; mga Garcia sa Sugbo; ug daghan pang uban.
* * *
Nisamot kahawod ang mga dinastiya atol sa administrasyong Duterte. Ang kaugmaon sa 112 milyones ka Pilipinhon hukman lang sa 250 ka politikanhong pamilya. 163 ka pamilya dunay senador, kongresista o gobernador: 29 sa Sugbo ug Kabisay-an, 44 sa Mindanao ug 88 sa Luzon. 60 sa 81 ka gobernador mga sakop sa politikanhong dinastiya. Duna silay 108 ka paryente nga nagtungkawo sab sa pagka bise gobernador, provincial board member, mayor, bise mayor ug konsehal.
Salamat ni Presidente Duterte, imposible na nga mapasar sa Senado ug House of Representatives ang dugay nang gipasalig nga mga balaudnon batok sa turncoatism ug politikanhong mga dinastiya.
* * *
- Latest
