EDITORYAL - Pakusgan ang trade, pasagdi ang aid

Trade o negosyo ang gustong mahitabo ni president-elect Ferdinand Marcos Jr. tali sa Pilipinas ug Amerika.

Maayo kini tungod kay nindot paminawon ug makapataas sa garbo ug dungog sa mga Pilipino.

Apan mao ba gyud kini ang tinuod nga nahitabo nga nagsalig lang ang Pilipinas sa hinabang sa US?

Unsa may buot ipasabot ani, mura og nagsalig ang Pilipinas o nagpaabot lang og hinabang gikan sa US.

Ang US ug Pilipinas dugay ng trading partners, dunay mga produkto sa Pilipinas nga gikinahanglan sa US ug vice versa.

Nagpasabot nga duna nay kasamtangan nga trade relations ang duha.

Ang tabang sa US mao kadtong panginahanglan sa mga nasud sama sa Pilipinas nga naghinobra sa ilaha.

Bisan og salin o surplus kini nila, mapuslan pa sa ubang nasud nga di makapalit o way  pundo para niini nganong di man dawaton?

Di kinahanglang ikainsulto o ikauwaw ilabi na kun gihatag kini nga kinasingkasing. Kung kaya sa budget, mahimo rang paliton.

Kung dunay kondisyon, dili na kini tabang, mahimo na kining isipon nga trade o ba kaha barter sa kinaraan pa.

Kinahanglan nga pangusgan sa Pilipinas ang produksyon niini sa mga produktong  makaengganyo sa mga Amerikanong negosyante pag,-import niini ngadto sa ilang nasud.

Dili husto isipon nga ang aid ug trade parehas. Lahi kining duha.

Husto si Marcos nga pinaagi sa trade makatabang kini og dako sa Pilipinas. Kani ang dapat tutokan.