Kinahanglang kopyahon si Noynoy

Giawhag si President-elect Ferdinand Marcos Jr. sa mga sakop sa iyang economic team sa pagkopya sa mga programa ni anhing Presidente Noynoy Aquino. Nakaseguro ko nga wa nila hisguti ang ngan ni Aquino. Aron di moulbo ang kaspa sa anak sa diktador.

Ambot wa bang kabantay ang sunod nga tagduma sa Malakanyang. Nga gikumbinser sa iyang mga tinudlo pagsagop sa mga programa sa anak ni anhing Presidente Cory Aquino. Ang nipukan sa diktadura niadtong 1986. Pero bisan makabantay pa way laing kapilian si Marcos Jr. gawas sa pagsunod sa rekomendasyon.

* * *

Ang bag-o niyang gitudlo nga sunod nga finance secretary, si Gobernador Benjamin Diokno sa Bangko Sentral ng Pilipinas, way lipudlipod sa iyang rekomendasyon: Labing epektibong paagi pagbayad sa dakong utang nga ibilin ni Presidente Rodrigo Duterte mao ang pagpadayon sa ekonomikanhong mga programa sa iyang gabinete.

Ug ang pangu sa economic managers ni Duterte nga si outgoing Finance Secretary Sonny Dominguez maoy labing unang moangkon nga igo ra sab nilang gipadayon ang mga programa ni Aquino. Nga maoy gipasidunggan sa labing paspas ug labing dakong paglambo sa nasudnong ekonomiya.

* * *

Mas direkta pa gyod ang rekomendasyon sa gitudlo ni Marcos Jr. nga tagduma sa National Economic and Development Authority. Si Arsenio Balisacan nipahibawo nga banhawon sa labing daling panahon ang public-private partnerships (PPP). Aron mapalambo dayon ang ekonomiya nga nihagsa sa kapin sa duha ka tuig nga pandemya sa Covid-19.

Ang PPP maoy responsable sa paspas nga pagtukod sa higanteng mga proyekto atol sa administrasyong Aquino. Apil nang P35 bilyones nga taytayan nga nagsumpay sa Cebu City ug Cordova.

* * *

Tungod sa kapakyas pagpresentar og klarong plataporma sa ekonomiya atol sa kampanya, gitambagan si Marcos Jr. nga makuha niyang suporta sa mga negosyante kon itudlo ang ligdong nga mga ekonomista sa nangaging mga administrasyon.

Gibalibaran siya sa kasagaran sa gabinete ni Aquino. Pero mao ra gihapoy sugyot nga nadawat: Ipadayon ang nasugdan ni Noynoy. Nga giilang mortal nga kaaway sa iyang pamilya. Pero, sa natad sa ekonomiya, maoy labing malampuson kon ikumparar sa tanang nangagi nga mga presidente. Apil nang iyang mga alyado nga silang Duterte, Gloria Arroyo ug Joseph Estrada. Ug, nakatag-an ka, ang iyang amahan.

* * *

[email protected]