Paspas tinuod ang pagbiyahe agi sa Cebu-Cordova Link Expressway (CCLEX), ang ikatulo nga taytayan nga nagdugtong sa South Road Properties paingon sa Cordova, apan ang problema kay gagmay pa ang karsada sa Cordova.
Natural nga inig abot sa mga sakyanan didto sa Cordova, makasugat gyud dayon og grabeng traffic. Nindot unta nga samtang gitrabaho pa ang taytayan, gipalapdan sab unta ang mga karsada sa Cordova paingon sa Lapu-Lapu City.
Ikaduha, kon pananglit moari ka sa Cebu City, layo pa kaayo ka og tuyokan usa ka mahiabot sa downtown kay wa man tumana ang plano nga butangan og tipas nga karsada paingon sa Barangay Pasil.
Aw, maayong pangutan-on nato ang mga traffic personnel sa Mandaue ug Lapulapu City kon namenos-menos pa ang nasinati nilang problema sa traffic human nga gipaagian na ang CCLEX.
Ang nindot sab unta mao kadtong proyekto ni Lapulapu City Mayor Ahong Chan nga magbutang og coastal highway nga mobagat sa CCLEX unya direkta nga mopaingon sa Mactan Airport, kay mas dali unta kadto nga agian.
Apan unsaon man, tungod sa politika gibabagan sa mga kaatbang sa mayor. Kining coastal highway sa Mandaue paingon sa Liloan, angay usab kini nga palamboon kay pinaagi niini, mamenos-menosan ang problema sa trapiko sa Consolacion.
Diri sab sa Talisay, Minglanilla, Naga, San Fernando ug paingon na sa Carcar, angay sab unta nga dunay coastal highway nga himoon aron nga masulbad ang problema sa trapiko dihang dapita.
Gipalapdan man tuod ang karsada sa maong mga lungsod apan tungod sa pagdaghan pag-ayo sa mga sakyanan, dili gayud masulbad ang kahuot sa mga sakyanan.
Mao kana ang rason nga mahadlok ko nga moagi diha nga mag-drive og four wheels atol sa “peak hours” kay sigurado gyud nga malangay sa biyahe.
Sus layoa ra didto sa Thailand. Gikan sa Thailand Airport, mga oras gyud nga paspas ang dagan sa among coaster van paingon sa Bangkok City nga way hunong ang biyahe kay duna may skylane.
Ingon sab niini ang buhaton sa atong mga opisyal sa kagamhanan, ilabi na sa Department of Public Works and Highways (DPWH), apan ang ilang gihimo hinuon, gub-on ang mga nindot nga karsada kay sementohon pag-usab.
Pagkanindot kaha no, kon makabalik ko sa Thailand, o kaha sa Japan.
Ang atong mga opisyal nagbalikbalik na sila pag-travel sa laing mga nasud, apan ang ilang makita didto dili nila ipatuman dinhi.
Kon moingon mo nga way igong budget nga magasto, pangitaan og pamaagi. Pananglit dunay private company nga mohimo sa skylane, ug pabayran sa mga moagi nga mga motorista, dili ba nindot?