Nilawas nga pagkab-ot sa damgo sa mga bata

Gibuksan niadtong Lunes ang limited face to face nga klase sa 13 ka mga eskwelahan nga nahimutang sa mga bukirang barangay sa dakbayan sa Sugbo diin gihulagway sa Department of Education Cebu City Division nga nagmalamposon.

Kini human sa kapin sa duha ka tuig nga nagpatuman og modular learning ang mga eskwelahan sa syudad sukad sa pag igo sa COVID-19 pandemic nga nakapausab sa tanan nga naandan sa systema sa atong edukasyon.

Gihangop sa mga ginikanan ug sa kabataan ang paghibalik nila sa pagtunob sa gikamingawan nga tunghaan ug sa mga classmates ug labaw sa tanan sa mga magtutudlo nga makahimamat na personal sa ilang mga tinon-an.

Ang pagbukas sa nilawas nga klase sa mga estudyante dili basta basta kay miagi kini sa makuti nga proseso aron masunod gyud ang mga protocols nga nakabase sa lagda IATF.

Taas nga preparasyon ang gihimo sa DepEd sa dakbayan lakip na niini ang pagbakuna sa mga tinon-an ug mga magtutudlo ug sa tanang mga tawo nga mosulod gawas sa mga eskwelahan.

Niadtong nakalabay’ng buwan nagpahigayon na og vaccination rollout ang Cebu City Health Department sa 13 ka mga eskwelahan base usab sa request sa DepEd aron matuman ang gitinguha nga pagbalik sa mga tinon-an sa eswkelahan.

Ang tanan nga nakasalmot sa klase mga bakunado na apil na ang mga magtutudlo ug kadtong mga ginikanan nga gustong magpabakuna aron segurado nga lig-on ang resistensya nila ug malikay sa virus.

Kining mga eskwelahana nahimutang sa mga bukid nga walay kaso sa COVID-19 busa kompiyansa sila nga luwas ra ang pagpahigayon sa limited face to face classes.

Unang hugna pa lang sila sa mga tunghaan nga apil sa face to face kay sa Mayo 30 mosunod na usab ang laing 37 ka mga tunghaan sa urban baranggay sa dakbayan sa Sugbo.

Target sa DepEd nga makabalik na sa 100% ang nilawas nga klase sa mga bata sa dili pa motapos ang karon  nga tuig tigtungha, limitado man gihapon kini apan dako na kaayo ni nga katumanan sa gidamgo nilang pagbalik sa mga tinon-an sa mga eskwelahan.

Maayo kini nga kalamboan alang sa kaayohan usab sa mga bata nga anaa pa sa ilang formative years nga maagak og tarong sa pagkab-ot og kinaadman.