EDITORYAL - Usbon kaha ang kasaysayan?

Sa resulta sa nakalabay nga piniliay kun basihan ang gidaghanon sa mga nibotar kang Ferdinand Marcos Jr. dinhi, nausab na ang sentimiyento ug pagtan-aw sa mga Sugboanon sa Marcos.

Naila na ang Sugbu sud sa nanglabay nga mga dekada nga anti-Marcos nga lalawigan. Sugod sa Edsa Revolution, walay Marcos nga nidaog dinhi.

Apan sa bag-ohay lang nga nahumang eleksyon kun mamahimo ng opisyal ang resulta ug molingkod na si Marcos pagka-pangulo naputol na ba gyud kaha kini.

Dili lang ang Sugbu, nausab na ba kaha ang pagtan-aw gyud sa mga Pilipino sa kasaysayan sa diktadorya? Dunay dakong papel ang social media sa maong kausaban.

Sugod niadtong 2013 nabantayan na ang mga posts nga nagsige og himakak sa mga nakasulat na sa libro bahin sa mga Marcos. Dunay panultihon nga nag-ingon, “only the victors write history,” maingon na ba kaha niini ang mahitabo kun di Marcos Jr. opisyal nga molingkod isip presidente sa Pilipinas?

Kung gusto niyang pamatud-an sa tanan nga dili siya parehas sa iyang amahan, mahimo niya kining buhaton pinaagi sa buhat. Pinaagi sa paghimo sa iyang mga gipangsaad ngadto sa katawhan atol sa kampanya ug magpabiling matinud-anon sa katawhan ug dili pasagdang dunay mga mangurakot nga mga opisyal sa gobiyerno.

Kinahanglang unahon ni Marcos ang pagpangita og mga banggiitang economic managers aron mabalik ang kumpiyansa sa mga investors, local man o langyaw. Tinud-on ang pagpadayon sa build build build program ni  Pres. Rodrigo Duterte apan dili ipaagi sa pagpangutang sa gawas kondili private -public-partnership.

Palig-onon ang modernisasyon sa tanang ahensiya sa gobiyerno ilabi na sa edukasyon, panglawas, depensa ug seguridad sa nasud ug labaw sa tanan, agnihon ug dili pugson ang kabataan aron mas inspirado ang bag-ong henerasyon sa patriyotismo.Kung napalambo ni Duterte ang serbisyo sa mga buhatan sa gobiyerno, labing maayong palabwan pa niya kini aron nga ang mga tawo makapasigarbo nga tinud-anay nga sayop ang kasaysayang nasulat bahin kanilang mga Marcos.

Ang Pilipinas usa ka malamboon ug progresibong nasud, nagkinahanglan kini og lig-ong lider nga motan-aw sa kaayohan sa kinabag-an sa katawhan ug dili sa pipila lamang nga dunay interes. Ang interes sa kinabag-an maoy angay unahon.