Usa sa mga pagtulon-an nga akong nakat-onan gikan ni anhing Dr. Jose “Sir Dodong” Gullas, nga napanunod gikan sa iyang bantogang amahan nga si Vicente Gullas, nga dunay mga panghitabo nga morang toothpaste: Kon mogawas na sa tubo, di na mapasud pagbalik.
Ganahan kong motuo nga ang labing dakong tampo sa kampanya nilang Bise Presidente Leni Robredo ug Senador Kiko Pangilinan mao nga ang napukaw nilang pagpakabana sa katawhan di na mapakatug pagbalik. Ug nga ang nalilian nga gingi sa paglaom sa mas maayong ugma di na matabonan pag-usab.
* * *
Mahimo sab nga, sama sa naandan, nag-ilusyon ra ko. Nga ang kadasig sa kasagaran sa mga boluntaryo, bisan o tungod sa ilang kabatan-on, di molahutay lapas sa mosunod nga mga adlaw. Ang kahapdos sa kapakyas pagpadaog nilang Leni ug Kiko mahimong makapa-apura gani nila pagpangiyugpos ug pagpaantaw na lang sa mga panghitabo sa palibot.
Mahimo ganing lahi ang ilang reaksiyon sa pagpanghawod sa mga bakak ug pinalitay sa boto: Mangita na lang og paagi unsaon nga makakabayo, kay wa man diay kapuslanan ang pagsuway pag-usab, sa lang-og nga sistema.
* * *
Laing ilusyon ang napusgay sa resulta sa eleksiyon niadtong Lunes. Ang mayoriya sa katawhan wa diay mabalaka, kay puwerte man nilang abiba pinaagi sa balota, sa lapad nga pangurakot, pangabuso sa gahom ug pagpangyatak sa balaod nilang Presidente Duterte ug Ferdinand Marcos Jr.
Pero di ang katawhan ang kaaway. Sama nato, mga biktima sab sila sa di makiangayon nga sistema. Karong nakaila na sa tinuod nga dagway sa nasud, makasugod na ta sa pagpangita og mamugnaon nga mga paagi sa pagbanhaw sa kaligdong sa panggobyerno.
* * *
Di na nato makalimtan ang katam-is sa pagtinabangay para sa kawsa nga mas dako kay sa atong kaugalingon. Di na nato masalikway ang kalalim sa pagkab-ot sa tarung nga katuyoan sa atong kaugalingong mga paningkamot.
Di na nato itahan ang kahinangop nga makakita og liderato nga ang interes sa nasud ug sa katawhan, di personal nga mga panginahanglan, ang gipalabi. Di na nato tugotan nga mataligam-an ang kaamguhan ang katawhan ang tinuod nga gamhanan. Tungod ana, ako masaligon nga may sukaranan ang pagsalig nga di na ta mobalik pagluklok sa suok.
* * *