Kasikas sa May 9 election

Duha ka adlaw sa wala pa ang piniliay, may partido nang miteks nako, nagpahibalo unsay link nga pindoton sa internet aron mahibaw-an ang numero sa akong voter’s precint, cluster room ug uban pa.

Nahibulong ko. Wala man koy gihatag nga cellphone number ngadto ni bisan kinsang politiko. Ug nganong nasayod man sila? Kinsa kahay mihatag?

Unya, pagka Domingo, bisperas sa piniliay, pag-abot namo ni misis sa balay gikang misimba, may pinilong gagmay’ng cards sab nga gipatong sa akong lamesa, nga aduna nay mga ngalan namo.

Sa maong cards, naimprinta na ang sequence number, precinct number ug cluster number. Nagagikan kini sa lain pong partido.

Pinalahing paagi nga PR to voters. More friendly, more accommodating!

Hinuon, wala na kini namo magamit. Kay usa ka semana pa lang, sa wala pa ang adlaw sa piniliay, nahibaw-an na namo daan ang among precinct, cluster, sequence numbers ug school building location, diin adto kami mobotar. Gisulat-imprinta na pod nako daan ang tanang kandidato nga maoy akong napilian.

Samtang akong misis ug mga anak, may kaugalingong ilaha sab.

Tuod man, pag-abot sa election day, alas 6:00 pasado sa buntag didto na kami sa presinto. Nagpunsisok na ang mga botante. Ug kay tulo man ka andana ang akong gisaka, pag-abot sa itaas, nag-abot akong ginhawa sa grabeng kakutas.

Puwerte nakong suyop og hangin aron dili makuyapan. Lahi na gyod kon kita anaa na sa mga senior moment.

Kay motikang lag pila ka ang-ang, hangak na!

Maayo na lang, kay abtik ang mga naasaying mangangalagad.Tudloan ka ug tabangan sa imong panginahanglan. Dali ra kong nahuman sa pagbotar. Diin, pag-abot ko sa vote-counting machine (VCM), ipatsek gyod sa in-charge ang molugwang resibo kon ang naimprintang mga ngalan sa gipiling kandidato eksakto ba?

Sa maong presinto, sa mga oras nga didto pa ko, walay iregularidad nga nahitabo.

Husay ang dagan. Kon kinsay gipiling presidente nga maoy gipakaon mo sa VCM, mao gyoy mogawas sa resibo nga ilugwa.

Ug kon kining susamang situwasiyon mahitabo usab sa tanang presinto, sa tanang dapit ug sa tanang yugto sa tibuok Pilipinas, seguradong matagamtaman nato ang ginadamgo tang usa ka patas, malinawon ug ligdong nga eleksiyon.