Hinaut di tinuyo ang mga bulilyaso

Sa kapin sa oras nakong linya sa akong presinto sa Pagsabungan Elementary School sa Mandaue City gahapon, katulo ko duola sa mga sakop sa electoral board (EB) nga nagsusi kon senior citizen ba ko. Sa unang duha ka higayon, ako silang giingnan nga wa na ko magpatina sa akong buhok.

Pero sa ikatulong higayon, nga labihan nang alimuota kay wa nay kapasilongan, diriyot na kong matental pagpamakak. Maayo na lang nga may nipada nako sa letrato ni Bise Presidente Leni Robredo nga dul-an duha ka oras nga mapailubong naglinya sa Magarao, Camarines Sur.

* * *

Daog o pilde, nideklarar nang mga nipili ni Robredo nga wa sila masayop. Si Robredo nipili sa pagtuman imbes paglaktaw sa mga lagda. Laing nagpapili pagka presidente gikuyogan og panon sa mga guwardiya ug gihawanan ang tanang babag aron makabotar dayon.

Bisan ang mga nanagan sa mas ubos nga katungdanan nagdumili sa paglinya uban sa kasarangang mga botante. Usa sa nidagan sa pagka kongresista sa Cebu City naputos sa sulirap sa mata sa ubang botante, ug posibleng nawad-an og pila ka boto, dihang nisapaw sa mga nag-una.

* * *

Makapabalaka ang pagkaguba sa kaliboan ka vote counting machines sa Sugbo ug ubang bahin sa Pilipinas. Nga niresulta sa pagsugo sa Comelec nga itugyan sa mga botante ang ilang mga balota sa mga sakop sa EB. Aron tingbon pag-scan, ubos sa pagbantay sa watchers, kon maayo nang mga makina.

Kay mamugna ang mas dagkong problema kon magpaabot ang mga botante sa pagkaayo sa mga makina: Matanggong sila og pila ka oras; di makabotar ang mas daghang botante nga nagsunod nila; ug mahimong di mahuman ang eleksiyon sa gitakda nga panahon.

* * *

Nahibung ang pipila ka botante nga napapas dayong tinta sa ilang kuko dihang gihugasan og alcohol human nibotar. Pagkabati sa ilang kasinatian, ang akong asawa nipasirit sab og alcohol sa iyang kuko. Pero nagpabiling tinta. Nakahunahuna nga tungod kay mas dugay siyang nanghunaw.

Human nakabotar gahapon sa hapon, nangayo ko og alcohol sa guwardiya sa eskuylahan. Bisan giunsa og pasirit ug nudnod sa trapo sa akong kuko, bulingit gihapon. Tingali wa tuyoa nga nalasaw ang tinta sa uban. Hinaot nga way maniobra.

* * *

[email protected]