Diha sa atong pagpili

Usa sa mga gahum nga atong nahuptan ingon nga tawo mao man ang gahum sa pagpili. Bisan gani sa atong inadlaw adlaw nga kinabuhi kinahanglang mopili kita kun unsay atong kan-on o imnon.

Atong pilion kun asa kita moadto ug asa kita mosuroy. Sa laktod, mahinungdanon gyud kaayo ang pagpili ug angayan lamang nga ato kining gamiton sa hustong paagi.

Kun sa mga butang yano kita pilian, unta sa mas seryosong hilisgutan maantigo unta kitang mogamit sa husto sa atong gahum sa pagpili.

Karong adlawa ang tibuok nasud inubanan sa mga lumulupyo ang mohimo og usa ka mahinungdanong desisyon. Mahimo nga kining maong desisyon makapalambo o makapaunlod ba hinuon sa atong ekonomiya ug nasudnong seguridad.

Sa atong pagpili sa atong sunod nga presidente, atong himoon ang masubsob nga pag-ampo ug maigmatong paglihok. Kini tungod kay ang atong nasud bililhon ug sagrado mao nga dili angayang tugotan nga kini isindikato.

Ang mga kabataan nagpaabot sa mas maayo nga kaugmaon mao nga ang atong pilion sila nga manggihunahunaon ug tinud-anay nga nagpakabana. Atong pilion sila  kang kansang kinabuhi nasukod diha sa pagpangalagad.

Atong pilion sila nga dali ra kaayong duolon panahon sa dakong kalisdanan. Sila nga naghago aron makab-ot ang gitinguhang kalamposan dili lang alang sa kaugalingon kondili sa kadaghanan.

Apan sayang lang kun kining maong gahum atong gipasagdan.

Mao nga daghang kahiwian sa sistema ang nagpadayon gumikan kay atong gipili ang kangitngit kaysa kahayag.

Panahon na karon sa paghigmata. Dili tungod ug alang sa imong kaugalingon lamang kondili tungod sa atong nasud.

Tugkara ang kahimtang karon kay daw sa salingkapaw ug haguka lamang ang mga laughing emojis gi reply sa metikolosong pagpasabot. Apan lisud kaayo mosabot labina kun mubo ra gyud kaayo ang salabutan.