Boto sa kaugmaon

Kapin sa 60 milyones ka mga Pilipino ang mag-ambahan ugma sa nagkadaiyang prisento lukop nasud aron mopili sa sunod nga mga lider sa atong nasud, probinsiya, syudad ug mga lungsod.

Sa kinatibuk-an dunay 18,100 ka mga posisyon gikan sa presidente, bise presidente, senador, congresista, gobernador, bise gobernador, board member, mayor hangtud sa mga konsehal ug ingon man partylist ang giilogan sa mga kandidato.

Ang orihinal nga gidaghanon sa mga posisyon moabot unta og 8,180 apan giuswag ang pagpahigayon sa election didto sa Bangsamoro Autonomous Region in Muslim Mindanao (BARMM) unya sa tuig 2025.

Basi sa talaan sa Comelec, dunay 67.5 milyones ka mga rehistradong botante ang Pilipinas nga mahimong mobotar ugmang adlawa. Apil na niini ang 1.8 milyones ka mga overseas Filipino.

Niining maong gidaghanon magdepende ang kaugmaon sa atong nasud sa mosunod nga unom ka tuig. Ang imong boto ugmang adlawa posibling makausab sa direksiyon sa atong nasud ngadto sa kalamboan o sa kaalaotan.

Ang imong usa ka boto posibling mahimong pabilo sa pag-antos sa imong mga anak ug sa mosunod pa nga henerasyon.

Atong hinumduman nga malungtaron ang kadaot nga ibilin sa atong sayop nga pagpili og mga lider.

Tinuod unom ka tuig ray termino sa presidente apan ang epekto sa bati ug hiwi nga pamunoan lisud nga mapapas diha-diha.

Kun nakabantay mo nga ang mga sayop nga binuhatan sa nangagi ta nga mga lider hangtud karon atong nabatyagan bisan dugay ra silang nahanaw sa pwesto.

Ang kawad-on nga nasinati sa bagang duot sa mga Pilipino hangtud ron resulta sa sayop nga mga prioridad ug polisiya sa nanlabay nga mga lider.

Dili sulagma nga daghan sa mga Pilipino ang mas gipiling molangyaw ug mag-antos sa kamingaw nga layo sa pamilya kay sa magpabilin dinhi sa nasud tungod sa kapakyas sa atong mga lider paghatag nila og maayong oportunidad.

Bisan ang atong mga mag-uuma nag-antos sa kawad-on taliwa sa kaabunda sa gasa sa kinaiyahan tungod sa wala pagpakabana sa atong mga lider paghatag sa suporta nga ilang gikinahanglan.

Ang nakapait gobyerno pa maoy nagduot nila sa kalisud tungod sa sayop nga mga polisiya sa agrikultura.

Kun duna may pundo aron itabang sa mga mag-uuma kurakuton sad sa mga buaya sa burukrasya.

Busa ayaw kalimot, sa imong pagbotar ugmang adlawa pilia ug kilatisa og maayo ang imong kandidato alang sa kaugmaon sa atong nasud.